O le galuega o se malumalu e tali atu ai i le numera o le matagaluega a le Katoliko i totonu o le nofoaga lea e ta‘ua o Malololelei, na faapaiaina i le faaiuga o le vaiaso na tea nei.
O le nofoaga lenei o loo iai fanua o le ekalesia Katoliko i uta atu o Vailima. O se nofoaga mataina le taatia mai i le maualuga o lea nofoaga.
O le nofoaga lea e ta‘ua o Malololelei lea ua iai le isi ofisa o le Ekalesia Katoliko aemaise o malumalu ma nisi o maota i totonu o le lotoā tele ua foliga mai o se aai ae o le malumalu lea na faapaia i le faaiuga o le vaiaso na tea nei, o se malumalu lava lea mo le mamalu o le ekalesia o loo afifio i lea itu o le atunuu aemaise foi nisi ua faatau fanua ma ua faamautu ai i Malololelei.
E $2 miliona tala le tau aofai na fuafua i ai lenei galuega ma e ui o lea ua mae‘a le tino atoa ae na manino o loo iai lava ni vaega o lenei galuega e lei mae‘a ma ua faagasolo lava galuega faaiuiu ma le taumafaiga ia vave ona atoatoa lelei le malumalu lenei, ae o lea ua faapaia ma ua amata ai sauniga i totonu.
O Iesu le Agalofa Mamana o le igoa o le Matagaluega lenei poo le Divine Mercy i le Gagana Peretania ma e pei ona ta‘ua e le afioga i le Tiakono o loo vaaia lenei galuega, e oo atu e na o le faavae o le galuega ua mae‘a ona fai ma le tala o le tupe ua fuafua e $2 miliona peitai e lei faaauau lea tulaga ma na toe laga loa e le afioga i le Tiakono ia Felise Samoa le galuega, ua sui le tufuga ma lana aufaigaluega, ma e tolu masina lea na toe atiae ai le galuega ma faauma loa ma e i lalo ifo o le $1miliona tala le tau atoa na alu i le galuega lea ua mae‘a.
O le faamalosi a le fesoasoani i le aulotu o i latou ua tofia lava e le taitai o le Ekalesia Katoliko i Samoa o se nuu fou ma o le tau atiae ua feagai ai nei ua fai lava o le nuu fou ma o se matagaluega fou. O lea la ua faapea ona faaauau galuega o totoe ae ua usuia foi le fono a le ituaiga lea e ta‘ua o le Divine Mercy poo le ituaiga o le Iesu le Agalofa Mamana i lenei vaiaso ua faaaogā ai lenei malumalu.