E moni lava e lelei, e lelei le Atua!
O se aso na faatōfala‘ina, se aso uigaese ma le matagofie, le aso fai mai le au faiupu a le atunuu, “Ua atoa tupe i le fafao, ua sa‘aoti le utu a le faimea, ua aofia moli i le futiafu e tasi.”
O lupe sa vao eseese ae ua fuifui faatasi, ua fuā fai mai ekalesia, aiga, uo ma ē masani i le talalelei a Keriso i soo se tafa o le kelope ona o le molimauina o le aso taupoina aemaise o le faaalia o le valevale alofa e ala i seleni ma tupe paia.
O se galuega sa tagiilima ma faatagisia ai le Aao taitai o Ieova, lea ua mae‘a paniniu ai ma tini lau o le faamoemoe, ma ua moni lava le faisalamo o Tavita “Ua tala mai e le lagi le mamalu o le Atua; ua faaalia foi e le va nimonimo le galuega a ona aao. (Salamo 19:1)
O le Aso Sa, aso 4 o Aukuso na faataunuuina ai le faapaiaina o le malu tapuai o le ekalesia Aso Fitu Samoa Koneferenisi i Glenala lea o loo i le aai o Browns Plains. Sa taitaia lava le sauniga e le susuga i le faafeagaiga ia Pr Aitui Fanene, o ia o se lupe faalele mai Laulii ma Saleaumua i Aleipata, a o si ona faletua o Jacinta Fanene mai Moamoa ma Satuimalufilufi.
Sa feagai le Peresetene o le Ekalesia ma le lauga autu e lē gata o le agaga faafetai, ae o le faamalosiau i le faifeau ma le ekalesia, le susuga ia Pr George Munoz. O tala otooto o le galuega ma le faigamalaga a le ekalesia e lua ona vaega.
Sa fofogaina le vaega muamua e oo mai i le taimi nei, ma auiliiliina e le toeaina o le ekalesia le susuga ia Tofilau Iose Mataafā, ae o le isi vaega, o le taimi nei e oo atu i le lumanai, sa lologo le aofia i le lelei saunia ona faamatalaina e Sapoto Rosie Ierome (14 ona tausaga, o le ata o le lumanai o le ekalesia, o alo ma fanau).
Sa faatauina le fanua ma le fale ia Novema o le tausaga e 2012, ma e tele isi galuega sa toe faia ma le faafouga i le masina o Aperila ae faamae‘aina i le Aso Faraile aso 1 o Aukuso. Na faatauina le fale i le tau e tusa ma le $950,000.00 a o le tau atoa o le galuega na toe faafouina ai e le ekalesia e ova laititi ma le tasi le miliona tala.
Viia le Atua ua iu manuia le faamoemoe ma e momoli le agaga faafetai o le faafeagaiga ia Pr Aitui i le ekalesia ona o le loto tetele aemaise i latou uma sa lagolagosua.
O loo tauave pea le suafa o le lotu na resitala ai ma faavae ai le Ekalesia i Inala ae o loo faatali le igoa fou ona o le fanua ma le maota ua faatauina o loo i le nofoaga o Browns Plains.
O le susuga ia Tuiloma Tanu ma le faletua ia Pouli Sanft, o loo tutū mai le foe e avea ma taitai toeaina a le ekalesia. O le taitai o le malumalu o Teleiai Si‘u Lavea, failautusi a le ekalesia o Miranda Pule-Brauthaug, ma le teuoloa a le ekalesia o Leato Toa.
O le susuga ia Pr Toetu Faraimo sa avea ma Fofoga o le aso, ae o le tofa ia Tauatele Talavou Gasolo sa tu tootoo e fai ma sui o le ekalesia e faaleo se agaga faafetai ona o le aao mafola. O le tautalaga ia Faiumu Peni Vaili sa fai ma fofoga o le auvalaaulia ma Samoa na potopoto e momoli foi se agaga faafetai i le taumafataga aemaise o le maualuluga o faaaloaloga.
E lata i le $50,000.00 le seleni o le aao foai lava ia o ekalesia taitasi ae lei tauina ai le taulaga sa aoina ma le aao mafola o tagata taitoatasi ma tusi valaaulia. O lona uiga e lata lava i le $60,000.00 se seleni sa faamaopoopoina e le ekalesia SDA a Glenala i le latou faamoemoe.
