“Ia mau ma pipii lou loto i le Alii, ona mau ai lea o le aao taitai o le Alii i luga o le Ekalesia Fou,” o nisi ia o afioga na fai ma matua o le finagalo folafola o le Atua i le faatuina o le Ekalesia Fou le Emmanuel AOG Samoa i le aai o Melepone, Na leai se nofoa e avanoa o le malumalu o le Ekalesia AOG Samoa i le pitonuu o Braybrook, o le Ekalesia lea ale taitai aoao o Ekalesia Samoa i le Koneferenisi papalagi i Ausetalia le susuga i le faafeagaiga ia Onesemo Pulepule ma le faletua. Sa avea i laua ma matua faa le agaga poo faifeau a le susuga i le faafeagaiga ma le faletua o le Ekalesia Fou, le susuga ia Toso Tulolo ma Maria Lemoe Fale,
O le susuga i le Toeaina o le Matagaluega a Ausetalia le faafeagaiga ia Tito Fepuleai mai le aai o Sini na taitaia le sauniga, a’o le afioga faauuina a le Atua na fofogaina e le tasi foi o Toeaina o le matagaluega le faafeagaiga ia Alofi Tuuigamala mai le aai foi o Sini, ae o le faauuina o le Faafeagaiga Fou ma lona faletua, atoa foi ma le faapaiaina o le Ekalesia fou, na saunoa i ai le susuga i le taitai aoao, ona faee ai lea o aao tuufaatasi o le Komiti faafoe atoa e faapaiaina le faifeau fou ma lona faletua.
O isi sui o le komiti e aofia ai le susuga ia Kiki Taulapapa o le sui taitai, o le susuga ia Komisi Leagamisa o le aao tusitusi, ma le susuga ia Enele Taeliki o le teuoloa, na auai foi ma nisi o faafeagaiga a le Ekalesia AOG lava, faapea foi ma nisi faafeagaiga mai isi Ekalesia, aua lava le molimauina ma patipatia le faauuina ma le faapaiaina o le Emmanuel AOG.
Na mae’a le sauniga, ona alo ai lea i le taumafataga tele ma le felanulanuai na maau i ai le Ekalesia fou, o le susuga ia Uisa Uisa na fai ma fofoga o le aso, ma e le gata na taumamafa le aufaigaluega ma Samoa potopoto, ae na toia foi le laulau a Tumua e ala i faaaloaloga masani faale atunuu mo le aufaigaluega, na taape fiafia le aofia ma le valaaulia ma le mama ua lomi ma le vaa ua goto i faaaloaloga faa tupu a le susuga i le faafeagaiga taulagi ia Toso Tulolo ma le faletua ia Maria Lemoe Fale, aemaise o le mamalu male paia o le Ekalesia malosi a le Emmanuel AOG.
E momoli ai foi la latou faafetai tele ma le agaga faaaloalo, i le susuga i le taitai ma le faletua, aemaise o le aufaigaluega totofi a le Atua, faapea foi Samoa atoa na afifio atu, e lagolagoina lo latou faamoemoe, Faafetai silasila i le Atua ma lona finagalo. “Ia manuia le Ekalesia Fou”
