Ua lata mai le taimi e mapu ai le oi o tatou tagata i le agai i le aai poo le City, i le mamao aemaise o le faigata ona saili ni paka e paka ai taavale pe a malaga i se mataupu e fia maua ai se fesoasoani mai i le afioga i le Konesula o le malo o Samoa.
Ua talia le aveai a le malo o Samoa na tuuina atu i le pulenuu o Aukilani le afioga ia Tauaaletoa Len Brown i se fanua i totonu o Magele e faatuina ai se Maota fou mo le ofisa o le Konesula o Samoa, auā le faafaigofie ona savalia e o tatou tagata i mataupu tau i le tatou atunuu, aemaise lava o le faigofie mo le pakaina o taavale.
O le Aso Toonai ua mavae 24 o Ianuari na tumutumu ai le taulaga faatau o Magele, i le faafesagai ma le taulaga faatau, e sosoo ma le faleaiga o le KFC, i le mamalu o le atunuu, faapea sui o pulega o Aukilani ma itumalo, sui o tagata whenua, o le peresetene o le Ekalesia Metotisi i Samoa ma atunuu i fafo ia Rev Aisoli, Rev Elder Lucky Slade, o le afioga i le Minisita o le Matagaluega o Faatoaga ma le Vaomatua i Samoa, Afioga Le Mamea Ropati sa fai ma sui o le Palemia ma le Malo o Samoa, faatasi ai ma le pulenuu o Aukilani ia Tauaaletoa Len Brown, i le molimauina o le sauniga faapitoa e faapaia ai le fanua ua ofoina e faatu ai le Maota o Samoa, lea e faatautaia ai galuega a le afioga i le Konesula o Samoa.
O le ta o le 10 i le taeao na nofoia uma ai e malo faaaloalogia le nofoaga ma saunoa faafeiloai loa le fofoga o le aso le afioga ia Toalepai Lui Tautolo e faatuulima i le mamalu o Samoa potopoto ua aofia. Na sosoo ma le sauniga lotu na avea ai Rev Elder Lucky Slade ma ositaulaga i le Atua i lea taeao.
O le manatu autu o lea aso, “O le aso ua faia i le maelega o le Atua, Afai foi e le atinae e Ieova le fale e galulue fua i latou.” O upu luitau ia a le taitai sa faamalosi ai i loto o le atunuu ona o le galuega o le a faatinoina.
Na saunoa le afioga i le Minisita ia Hon Le Mamea Ropati, o le sui o le Palemia ma le Malo o Samoa i le tatalaina o lenei faamoemoe, na ia momoli ai le agaga faafetai i le Pulenuu o Aukilani ona o le faamatuu mai o se vaega o le laueleele i Magele e faatinoina ai le manaoga o tagata Samoa.
Na faamanino foi i lea saunoaga, e ono tausaga sa fuafuaina mai ai lenei faamoemoe, ona o le mafuaaga e toatele Samoa o loo nonofo i le itu i Saute o Aukilani, e faigata ona autovaa atu i le ofisa o le Konesula i le aai tele faapea foi le tau saili o ni paka o taavale.
Ua iai foi le talitonuga o le malo a mae‘a lenei galuega, o le a avea le Maota o Samoa ma ogatotonu o le sauniga faalemalo a le tatou atunuu i Aukilani nei, o le a iai foi se fale Samoa o le a faaopoopo atili ai tu ma aga o le atunuu i le taulaga i Magele.
Ae o le saunoaga a le Pulenuu o Aukilani ia Tauaaletoa Len Brown, na ia faaalia ai lona fiafia tele e tali le savali na agai atu ai le Palemia o Samoa le Susuga Tuilaepa Sailele Malielegaoi e uiga i se vaega o Magele e faatu ai se Maota o Samoa. Sa momoli foi lana faafetai i tagata Samoa uma sa auai i le lagolago i mea e faatino o le atunuu.
Na sosoo ma le suaina o le eleele e le afioga i le Minisita, Hon Le Mamea Ropati ma le pulenuu ia Tauaaletoa Len Brown.
O upu mulimuli o le aso na fai ai le afioga i le faipule o Magele le Tofa Su‘a William Sio ma sui o le mamalu o Samoa potopoto na auai e momoli le agaga faafetai i malo faaaloalogia sa faatasi atu aemaise o sui o tagata whenua sa lagolagoina lea faamoemoe.
