“Ou te atia‘e la‘u Ekalesia i luga o lenei papa, e lē mafai e faitotoa o seoli ona manumalo ai.”
Ua faa-Kerisianoina Samoa i le Tala Lelei na folau atu ma Misionare papalagi, lea ua sailimalo mai Samoa i atunuu o papalagi ma toe aumai le Tala Lelei ina ia faa-Kerisianoina ai tagatānuu o Samoa aemaise soo se tagatānuu e oo lava i papalagi.
O le Aso Sa na tuanai atu, aso 27 o Iulai na vivii soosootau‘au ai falesa e ono o le matagaluega a Melepone a le Ekalesia AOG Church of Samoa, e faapaia aloaia le galuega sa fai faamafutaga, lea ua aloaia nei o le Ekalesia i le pitonuu o Tarneit.
O le faafeagaiga o le Ekalesia fou o le susuga ia Fili Tuigamala mai afioaga o Fasitoo-tai ma Salelologa, ma le Faletua ia Aisa Tuigamala mai le afioaga o Toamua i Faleata.
O le komiti faafoe o le matagaluega a Ausetalia aoao na nafa ma le sauniga lotu, o le susuga i le sui taitai o Ausetalia a o le taitai lea o Melepone le susuga ia Apouani Tapuala Unasa na taitaia le sauniga.
O le teuoloa le susuga ia Faitoaga mai le aai o Sini na feagai ma le Faamanatuga, ona feagai lea o le Toeaina faufautua le susuga ia Lega Ropati Frost ma le tatalo e faapaiaina ai le Ekalesia fou, a o le upu folafola na fofogaina e le taitai aoao o Ausetalia le susuga ia Taeauga Ropati Frost mai le aai o Perisipeni, a o faavailolo isi faafeagaiga o Melepone le susuga ia Tavita ma le faletua ia Eseta, Solomona Vaofusi ma le faletua ia Moana, Teofilo ma le faletua ia Lele ma le susuga ia Tofa‘o ma le faletua ia Leafa, aemaise o le tapuaiga malu a isi faafeagaiga mai isi Ekalesia sa molimauina le faamoemoe.
E pei o tu masani i aso iloga faapenei, na sosoo le sauniga lotu ma le taumafataga tele na maau i ai le Ekalesia fou, ma faasolo ai ma a latou faaaloaloga mo le aufaigaluega paia ma le valaaulia, o le fofoga o Ale Sapa sa tu mo le Ekalesia na mati‘e ma maualuga ai le aso, ona tali fuaitau lea o le fetalaiga ia Namulauulu Ape Unasa e fai ma sui o le valaaulia.
E lē taumate ua laei Ieova i viiga siitia, auā ua inumalemo le faleselau o le Tagaloa Aopo i faaaloaloga. Ia utupupuina e le Atua le soifua o le faafeagaiga ia Fili ma le faletua ia Aisa, aemaise le Ekalesia fou a le AOG Church of Samoa i Tarneit, ia tele ni agaga e manumaloina mo le Atua.
