Ua matagofie le titilupe auā o lupe na vao eseese a o lea ua titi e tasi ina ua tau lau o le faamoemoe
O le paia ma le mamalu o le faamata e fia o Samoa sa vao eseese a o lea ua tinitauao ona o le molimauina o le galuega tele sa fauao faupo pe tua ma ni ā.
O lea ua mae‘a ma ua atoa nei tino o Vaatausili e pei o ia upu a le atunuu ina ua fesilafai i le lagi e mamā ma le soifua manuia e molimauina le faapaiaina o le ‘Ala o le Atua, le Ekalesia Metotisi a Logan City o le Faasinoti.
Na fuli faō vaa o mala ae laga vaa o manū auā sa faaloaloa agelu tausi mai le lagi na mafua ai ona tau lau o le faamoemoe i le Aso Faraile 26 ma le Aso Toonai 27 o Setema.
Na faagasolo taalolo ma tausala a matafale ona feagai lea ma le tauvaga pese lotu i le Aso Faraile. O se aso na vaaia ai le felanulanuai ma le matagofie o teuga eseese aemaise le toatele o aiga, uo, paaga ma ē masani na fuai fai mai e fia tuu tuu tau‘au i le faamoemoe o lea foi itu o le galuega.
O le Aso Toonai sa feagai ai ma le tatalaina aloaia e ala i se sauniga na taitaia e le Peresetene o le ekalesia aoao le susuga ia Rev Aisoli Iuli. Sa auai mai foi nisi o sui o le Komiti Tumau ma le ofisa ae faapea afioga i Sea pe tusa ma le sefuluono sa auai, ae tainane tausi matagaluega ma faletua.
O le faletua o le Sea i Kuiniselani le faletua ia Seuoletoi na oootiina le lipine ona ulufale lea o le faapotopotoga. O nisi o ekalesia na lautogia ma maualuga le aao foai i taulaga sa fai i ai le faatatau e latou te auai i le lagiina o viiga o le Atua.
O lea na tulaga muamua ai le taulaga a le ekalesia Metotisi poo le Matagaluega a Petrie, sosoo ai le ekalesia a Morton Bay ma Bundamba, tu tolu le aufaipese a le EFKS a Southwest Brisbane. Na faagasolo polokalame ma tusia le aao foai ma faamauina ai se seleni atoa na tauaaoina e tusa ma le $582,197.35. O le tau atoa o le galuega e tusa ma le 1.5miliona tala.
Na momoli le agaga faafetai o le susuga i le tausi matagaluega ia Rev Moloka ma le faletua ia Uaine Toleafoa i le paia lautele sa auai, e pei ona fai ai ma sui le tofa ia Tuaautoto‘a Auimatagi Seutalanoa Mapu Pone Timoteo sa tu tootoo i le aso.
E le mafai foi ona faagaloina le susuga ia Rev Elia Suisala ua malolo manumalo ona o gasegase sa uluai amataina le lotu faapea le susuga ia Rev Soti Soti o ia o le uluai faifeau i ni tausaga ua tuanai.
O le talaaga o le galuega ua 18 tausaga talu na amataina le ekalesia a Logan City. E lei faapito manū ia tasi auā na vaaia le lagolago a nisi o Ekalesia e opogi le faamoemoe o le ekalesia Metotisi a Logan City.
Sa auai taitai o pulega e 2 a Kuiniselani o le Matagaluega EFKS, Toeaiina ia Rev Lauie & Autagalaga Lupematasila faapea Rev Tauaaga & Senerita Mataafa ae lei auai le toeaina Faatonu.
O nisi sa auai o le taitai o le Ekalesia LMS Pasefika, Rev Alapati & Sarai Meatuaituuga, le Sea o le ekalesia Evagelia Uesiliana Metotisi, Rev Falema‘i & Kelly Mika ma le toatele o malo faaaloalogia mai Sydney, Melbourne, Niu Sila, Tutuila, Hawaii & Amerika ma le sui o le federal member ia Jim Chalmerd (VIP).
O le kamupani a le Apia 2’s Takeaway sa feagai ma le taumafataga i le Aso Faraile a o le tofa ia Poulava Sam ma Lona Matautia o le Uncle Sam’s Take Away sa tapenaina le taumafataga o le aso faaiu. Na leai se manu e olo auā sa ulimasao mea uma i le agalelei ma le alofa o le Atua.
I a manuia le galuega fou Logan City Matagaluega Metotisi!
