O le ekalesia Aso Fitu o le Toe afio mai i le taitaiga a le susuga ia Pr Tusitina Faiumu Ioane, na osia ai le feagaiga i le sakalameta o le faaipoipoga, i le aiga fou o le alii o New Delhi Faiumu ma lana manamea o Rachael Uolo Faiumu Ioane, i le afiafi o le Aso Tofi, 27 o Ianuari.
O tuaa o le tamaitai faaipoipo o Leiataua Uolo ma le faletua ia Faalelea Uolo mai Fagalii ma Manono. O mātua o le alii faaipoipo o Faiumu Tautua ma Gase Faiumu mai Falealili ma Taga i Savaii.
E toatele tauaiga sa faimalaga mai Sini ma isi setete o Ausetalia ona o le aso fiafia o le ulugalii fou.
O le tamā lava o le alii faaipoipo le tautalaga ia Faiumu Tautua sa fai ma fofoga o le aso. Na malaga mai foi le tuaa o le tina o le tamaitai faaipoipo ma nisi aiga mai Niu Sila sa maulauga ai le aso.
Na iu manuia mea i le alofa o le Atua. O alofaaga auina i o oulua mātua faapea aiga, uo ma ē masani.
