Na faatumulia le malumalu tapuai o le Word of Life Church i Otahuhu i le taeao o le Aso Sa, i le mamalu ma le paia o le au valaaulia aemaise lava o tagatalotu masani o le mafutaga, na latou molimauina ai le faataunuuina i le manuia o le faamoemoe o le alii o Jesse Sone ma le tamaitai o Margaret Tipi ina ua faapaiaina ma faamauina lo la alofa i le sakalameta paia o le faaipoipoga.
O se laasaga fou foi ua faavaeina e lenei ulugali’i fou ina ua faataunuuina lo la faamoemoe i le aso o le toutu manumalo mai o lo tatou Alii faaola mai lona maliu.
O le isi vaega lea sa fai ai ma faamamafa i upu timaiga apoapoai a susuga i faafeagaiga, ina ia faamalosia ai ma faamautu atili ai le faavae o le aiga o Jesse ma Margaret aua o lea ua pa‘ū tonu lava lo la aso fiafia i le faamanatuina o le toetu mai o Iesu Keriso, ina ia fai ma faamanatu ia i laua le alofa faamagalo ma le alofa le faatuaoia o Iesu, pei foi ona ua faataunuuina ai lo laua aso i le manuia.
O le susuga i le faafegaiga o Uilisone Taito sa feagai ma le sauniga o le faaipoipoga. Felanulanuai foi ma matagofie teuga ma faaaloaloga a aiga o le ulugalii fou na tali atu ai i le faamaloulou ane o le auvalaaulia aemaise foi o le galuega fita sa feagai ma susuga i faafeagaiga aua lava le faamoemoe o le fanau.
O le viiga sili lava lea o le Atua sa patipatia ma le faafetai, ona o le faamoemoe ua taunuu o le laau o le soifua lea.
Sa faapena foi ona faafiafiaina le ulugalii fou i faafiafiaga taga eseese ma le malie i le maimoa, faapena foi ona faaalia ai le siva uosi a le alii ma le tamaitai faaipoipo, faapena fo’i i sausaunoaga faasamoa a aiga, o uo uma ma e masani e momoli ai le fiafia e lagolagoina ai ma molimauina ai le aso fiafia o Jesse ma Margaret.
O faamanuiaga ma alofaaga mo oulua Jesse ma Margaret, ia sagai ane manuia o le Atua e faatumuina ai ma faapaiaina ai lo oulua aiga fou ua amataina nei. Ia oulua maua pea le fiafia ma ia tumau i le alofa faamaoni o le tasi i le isi ma ia tautuana le alofa o le Atua e faavae ai lo oulua aiga. Alofaaaga mo oulua mai a oulua aulotu, o oulua aiga uma, o a oulua faafeagaiga ae faasilisili alofaaga le mavae mo oulua mai o oulua matua peleina, Ia manuia. 
