E lata i le 500 le auvalaaulia sa molimauina le osia ai o le feagaiga e tuufaatasia ai Logan ma Jeannie i le sakalameta o le faaipoipoga i le Aso Toonai, aso 5 o Mati.
O le tamaitai faaipoipo o ona tuaa o Kalala mai Falefa, ma le afioga ia Mapuilesua Elia mai Gataivai.
O le faato‘ā faiava o ona tuaa o le faletua ia Faanape mai Safune & Laulii, ma le afioga ia Maualaivao Faulafo Tusitala Timoteo mai Malie ma Eva Salelesi.
O le ofisa fai faaipoipoga o le susuga ia Rev Ioane Tuupo (tausi matagaluega Logan City), Rev Matuu Taufua (tausi matagaluega Runcorn) sa ia saunia se upu apoapoai ma ni timaiga mo le aiga fou.
O nisi o faafeagaiga sa lagolagosua e aofia ai le susuga ia Fereti Vaalepu, Rev Si‘ologa Mapuilesua ma Kueva Tuimauga.
Sa mamalu le aso i mātua o le Saofaiga poo mātua mālōlō ia Rev Setu ma Tausaga Faaniniva, faapea le susuga i le toeaina ia Alapati Meatuai Tuuga Stevenson ma le faletua ia Sarai o le Ekalesia LMS Pasefika.
O le afioga ia Maualaivao Faulafo Tusitala ma le afioga ia Mapuilesua Elia sa faafoea le aso ma fai ma fofoga faapitoa, ae sa fai ma sui o aiga na lua le afioga ia Mapuilesua Pa‘itusi Eki e molimolia se valevalealofa i le paia o le aufaigaluega a le Atua faapea Tumua ma Pule sa potopoto, ma na matuai maualuga le tulaga i faaaloaloga sa faatinoina ona pelega o alo ma fanau.
O le agaga faafetai i le faamalieina i soo se vaega, sa tulai ai le tulafale o le ekalesia ia Faatoatoa Pepe mai Satupaitea e faafetaia le paia o aiga. Na sioa le aumaimoa i faafiafiaga sa tapenaina e alo ma fanau a le aiga, faapea le Five Stars ae teuteua le mea atoa e le faaili logomalie a le One Sound, susuga ia Eric ma le vaega.
Na faatumulia i aiga malaga mai Samoa, Niu Sila, Amerika ma nisi setete o Ausetalia.
O le laina a le alii faaipoipo, o lana uosili le susuga ia Albert Tuuga Stevenson; Sitivi Timoteo; Uesilē Timoteo; Daniel Eteru; Gus Brown ma Siilima Lauti ma avemama o Carlos Tuuga Stevenson ma Faafetai Mapuilesua.
Laina a le tamaitai faaipoipo, o lana uosili o Josephine Luamanuvae; Faafetai Tuupo; Sera Eki; Myra Ulufale; Kelly Timoteo ma Afato Mapuilesua Elia, ma le ave teu o Eden Eki.
O faamanuiaga ma alofaaga mai o lua mātua faapea mātua o mātua ma le aiga atoa amaise alofaaga mai le Matagaluega Metotisi a Logan City o le faasinoti a Kuiniselani.
Ia manuia le aiga fou, Logan ma Jeannie Timoteo!
