E tuua e le teine lona tamā ma lona tina ae mulimuli atu i lē ua ia alofa i ai, e tuua foi e le tama lona aiga ae faatasi atu i lē ua nanau i ai lona alofa, ona faatasia ai lea o i laua o le tane ma le fafine i le tino e tasi ona o le alofa ua mafanafana. O le Aso Toonai, aso 6 o Oketopa, na faapaiaina ai le ulugalii fou, a le alii o Joseph ma lana manamea le lalelei tasi i lona loto le tamaitai o Katherine Jennifer.
Na faatumulia le Sheldon Reception i Sunshine i aiga na lua, uo, ma paaga a le ulugalii fou, na afifio ma talaaao atu e molimauina le sauniga o le sakalameta paia, na osia ai le feagaiga o le alofa a le faato‘ā faiava ma le faato‘ā nofotane, ae le gata foi i lea, o avanoa matagofie ia e molimoli atu ai moomooga alofa o tauaiga mo alo ma fanau ua tuufaatasia ona o le alofa. Na taitaia le sauniga e le susuga i le faafegaiga ia Pastor Jeph Filipaina, o ia foi lea na faapaiaina le ulugalii fou.
O le alii faaipoipo o Joseph o le alo o le susuga ia Ron ma le tausi ia Falaula Reuelu, ae o le tamaitai faaipoipo o Katherine o le alo o le susuga ia Karl ma le faletua ia Agnes Lili Passi. O le uosili a le tama o le alii o Andrew Reuelu, ma le uosili a le teine o le tamaitai o Kissa Passi.
Na matagofie ma maualuga lo la aso tele ona e le gata i faamanuiaga a le aufaigaluega paia a le Atua, ae faapea foi le paia ma le mamalu o Samoa na auai, aemaise o a la uo ma paaga na faaalia o latou finagalo alofa e ala i meaalofa, faapea foi le Ekalesia ma nai o la aiga uma.
Ia manuia tele lo oulua aiga fou Joseph ma Katherine, tumau i le fealofani, faasilisili lo lua alofa ia Iesu, alolofa i nai o lua mātua ma aiga uma, aemaise o le alofa o le isi i le tasi. Alofaaga mai o lua mātua ma aiga uma , all your brothers and sisters and all your cousins. All the best in your journey together. Lots of love from Tim ma Lilian.
