O le manumanu lava o le Faamasinoga i le lē uma ai o aoga a ni alii talavou se toatolu na molia ma faamaonia le faavevesi i nofoaga faitele, na mafua ai le toe ave i ai o le isi avanoa ina ia mae‘a lelei suega faalea‘oa‘oga o lenei tausaga.
Ae o le tulaga moni lava ia e pei ona saunoa le tamaitai faamasino, Mata Tuatagaloa, e tatau ona tofu uma i le falepuipui ona o le tele o le tiga o le ulu, tele o le taimi maumau ma le faasoesa tele o nei tamaiti i nofoaga e pei o le Maketi i Fugalei ma le nofoaga faatalipasi i Savalalo.
O alii aoga nei e toatolu na taofia mai e Leoleo ma molia i le tauaifusu i nofoaga faitele. O lenei mataupu na ta‘ua e tolaulauga a le itu a Leoleo na logoina i latou e se tasi o tina o loo faia ni fusuaga a tamaiti aoga mai le Kolisi o Sagato Iosefo ma le Kolisi o Leifiifi i le aso 13 o le masina o Iulai i le Maketi i Fugalei.
O lea vevesi na mafai ona faata‘ape ina ua taunuu atu i ai Leoleo ma na latou taofia mai ai alii nei e toatolu e pei ona ta‘ua. O i latou nei o Albert Bell, Christopher Kleig mai le Kolisi o Sagato Iosefo ma le alii o Mathew Brown mai le Kolisi o Leifiifi.
Peitai i le taimi na valaauina ai lea mataupu e lei auai atu Mathew Brown ma ua talosagaina ai e le itu a Leoleo se tusi saisai mo lea alii. O i latou nei ua molia e ta‘i 18 tausaga ma o loo i le vasega faaiu ma o loo faasauni atu foi mo le suega mulimuli o le tausaga (PSSC).
“Ua tatau ona see le Faamasinoga i se isi tulaga ong a ua fai ma masani a aoga nei le fusu i nofoaga faitele ma o se faafitauli ua maitauina le faatuputupulaia aemaise lava i le va o aoga nei e lua”, o le saunoaga lea a le Afioaga i le Faamasino ia Mata Tuatagaloa.
Peitai na talosagaina e le itu a Leoleo le tuuina atu o se avanoa i nei alii ona o loo faafeagai ma a‘oa‘oga ma ua faamaonia nei i luma o le Faamasinoga Faaitumalo o la moliaga ma ua faapafala ai se faaiuga faafalepuipui e le Faamasinoga ae ua tuuina atu le 12 masina e fai ai ni auaunaga mo le lelei lautele o le atunuu.
O lea faasalaga na talosagaina ai e le sui o le Ofisa Faanofo Vaavaaia se taimi tatau e faatino ai ona toe tolu vaiaso faafeagai i laua nei ma suega faaiu o le tausaga ma ua talia e le Faamasinoga ma ua tuuina atu le avanoa ia i laua e sue ai a la suega ae a mae‘a loa ona faatino lea o le la faasalaga mo le umi e 12 masina.
