O le taimi nei, ua toe agai le toatele o le aufaifaatoaga i le tele o nuu ma alalafaga i Samoa, e toe totō le aano o tamalii, poo le laau o le ‘ava e pei ona silafia ai. O le masina na tea nei sa faalauiloa ai le faaiuga sa faia e le famasinoga i Siamani, i le mataupu lea sa taofia ai ona toe faatagaina le faaulufaleina atu o le ‘ava, i le tele o atunuu o le lalolagi, sa fiafia ma faaaogāina lea foi laau.
Ua vaeseugā ma ua tele foi tausaga ua mavae, o tapunia pea faitotoa o le tele o maketi o le lalolagi sa auina atu i ai le ‘ava, peitai o le masina na tea nei e pei ona ta‘ua, sa fofogaina ai le toe tatala o le maketi mo le ‘ava, ina ua faaleaogaina e le faamasinoga, ni tuua‘iga e faapea, e iai afaina o le soifua maloloina e mafua i le suaava.
O le mae‘a ai ona fofogaina lea faaiuga a le faamasinoga, ua toe faamalosia ai le aufaifaatoaga i Samoa ina ia toe susue le vao ma toe lalaga lea tamaoaiga o loo tanu i laueleele o nuu ma afioaga taitasi.
E tele afioaga o Samoa, o lo latou lea tamaoaiga, ona o le ola lelei ma le talaulau ai o le aano o tamalii. E iai le talitonuga, o nuu foi ia o le a matuā tele se tamaoaiga tau seleni o le a sasaa i ai, pe a manuia le seleselega o lea foi laau.
Peitai e ui ina ua toe faamalosia le au galue fanua, ma le au totō mo le toe totōina o le ‘ava, ae ua iai se isi faamatalaga e faapea, e iai se talosaga apili ua fuafua e toe faaulu, e toe lu‘i ai le faaiuga a le faamasinoga e pei ona faamatuuina i lea lava mataupu.
O le lua vaiaso talu ai, sa maua ai se feiloaiga ma le Peresetene o le S.A.M.E, le afioga ia Tagaloa Eddie Wilson, o ia foi sa tu malosi i le finauina o lenei mataupu, mai lava i le taimi na toafia ai le auina i fafo o le ‘ava, e oo mai i le taimi nei, e pei ona faalauiloa ai le toe tatalaina o lea sā.
Sa fesiligia e le Samoa Times, pe moni ua iai se isi faalavelave faasaga i le faaiuga sa faatoa tuuina mai. Saunoa Tagaloa, e moni, ua ia taulimaina se faamaoniga, peitai ua na o se faamatalaga e faapea, o le talosaga o loo tau fuafua e faaulufale, ua na o se talosaga ina ia toe faaopoopo se isi taimi e faamuta ai le tuuina atu o se talosaga apili. O le vaiaso talu ai, e faamae‘a ai le taimi sa faatulagaina, e tatau ona faamauina ai se talosaga apili.
O le autu tonu lea o le taumafai o le itu tetee, ina ia toe faaopoopo se taimi, ona talu ai, e lei lava tapenaina sa latou talosaga apili. E le gata i lea, ae o loo iai pea le talitonuga o Tagaloa e faapea, masalo lava ua na o ni faamatalaga faalele ua faasalalauina, ae ailoga e toe faia se apili a le itu tetee.
Saunoa Tagaloa, o le a tulituliloa, poo le ā se tali ane a le faamasinoga, pe talia le talosaga, mo se taimi faaopoopo. O se tasi o itu tāua sa faavae ai le finagalo o Tagaloa e pei ona ia ta‘ua e faapea, o Samoa o le atunuu tatalo, ma e malosi pea lona taliotonuga, e mafai e le mana o tatalo, ona faamausaliina le faaiuga a le famasinoga, e pei ona iai.
E lē na o Samoa e manuia i le maketi o le ‘ava i atunuu i fafo. O Fiti ma Tonga, ma isi foi atunuu o le Pasefika o loo totōina ma ola ai le ‘ava, o le a manuia uma ai, pe afai e faatumauina le faaiuga a le faamasinoga, ma toe faaauau ai le toe auina i fafo o lea foi laau aogā, ae o se oloa tāua mo Samoa ma atunuu uma o le Pasefika.
Sa faamaonia mai foi e Tagaloa e faapea, ua toatele afioaga ma nuu i Samoa, ua toe foi nei e faato‘a fanua mo le toe totōina o le ‘ava, ina ua mae‘a ona faasalalauina le toe avanoa ai nei o maketi i fafo, mo le auina i ai o le ‘ava. O se laau e taugata tele i atunuu i fafo, ma o se faamanuiga tele foi lea i le aufaifaatoaga, ona o le lelei o tupe maua, ma o le a siitia ai foi le tulaga o le atinae o le tamaoaiga o le atunuu.
O le a faatalia nei taualumaga o isi gaioiga mulimuli a le fili o loo faia e toe aiāina ai le faaiuga a le faamasinoga, peitai o lea tulaga, sa saunoa i ai Tagaloa, e leai se mea o faapopoleina ai lona manatu, faapea le au faifaatoaga, auā o le faaiuga sa‘o lava lea e tatau ona ia.
E tele foi tausaga ua tuanai e lei iai lava ni tuua‘iga sa faamaonia muamua i aafiaga o le soifua maloloina i le ‘ava, e pei ona faaleagaina ai e le au tetee.
