O se vaega o le vanu o loo i Tiavi e faafeagai tonu ma le afu o loo iai, o inā na nanati atu i ai le vaega laveai a le fuimu faapea le matagaluega o leoleo, e faatino le latou gaioiga e laveai ai le ola o se alii papalagi, lea na tofu i ai lana taavale i le afiafi o le Aso Tofi na tea nei, aso 8 o Novema 2012.
E silafia e le toatele ua afea lea vaega o le atunuu le pa uamea paipa o loo iai ma le fola sima e tutū ai tagata ma matamata agai i le afu. O le vaega tonu lea na tupu ai le faalavelave, lea na tofu i lalo le taavale ma maliu ai lava le alii papalagi na ia faafoeina.
O le faamatalaga a le aufaigaluega a le fuimu, sa umi se taimi o tau saili se auala agai i lalo i le vaega na palasi i ai le taavale, peitai sa faigata ona e tu le vanu ma e leai foi ni vaega faapitoa o le vanu o iai ni sitepu ua ta e vave ai le oo i lalo. E ui sa faafaigata galuega laveai, ae sa maua lava le avanoa ma taunuu ai le au faigaluega.
O le tino maliu o le alii papalagi na maua i luga o se vaega maupuepue o le vanu e iai laau ma papa, ae o le taavale na maualalo tele le nofoaga na oo i ai, ma ua lē toe aogā ona ua faaleagaina uma.
E tuuina atu le lipoti lenei mo le faasalalauina e lei maua mai se faamatalaga ma‘oti mai leoleo poo ai lea alii papalagi, ae ua faaalia e ni molimau o se alii sa aumau lava i Samoa ma lona aiga e aofia ai ona mātua.
Sa oo atu foi ona mātua i le nofoaga na tupu ai le faalavelave mo le molimauina o galuega laveai. O loo iai le talitonuga o se gaioiga tau pule i le ola na faia e lē ua maliu pe a fua i suesuega lata mai, e leai se mafuaaga ogaoga na ala ai ona palasi le taavale i le vanu.
O loo tele le vaega e tutū ai taavale pe a fia maimoa i le afu, ma e lelei foi le vaega e feliua‘i ai taavale ma toe agai ese pe a mae‘a. E ui foi e faapea e itiiti se vaega o loo iai le pa uamea paipa e tutū ai tagata ma matamata i le afu ma lalo o le vanu, ae e lē tatau lava ona tupu ai se faalavelave faapea.
O loo faia pea suesuega a leoleo i le mafuaaga ma e tatau ona faailoa se taunuuga o ia suesuega i le vaiaso nei.
