Mai i le amataga o le faavae mai o le Falemai Faamamā Toto i Samoa, e na o le toaono lava sui o le atunuu na togafitia ai. O le taimi lenei ua oo atu i le to‘a 120 le aofai o tina ma tamā matutua ma le isi toatele laiti atu ua sulufai nei i lea nofoaga i tausaga taitasi mo le faamamāina o le toto. O le vaiaso lenei na faamaonia ai e le Kapeneta o Samoa le toe tofia o le Susuga Mulipola Lose Hazelman e faaauau i le tofiga o le Pule Sili o lea Falemai. O le taulai la a lenei tamalii i le faaauau ai o lana auaunaga, o le unaia lea o taumafaiga ina ia maualuga pea le auaunaga i lenei vaega faigata o togafitiga mo ē gasegase i Samoa.
Na ia faamaonia mai le faaopoopo pea o le numera o tagata ua faamamā toto, ona e lē o faaitiitia foi le numera o le atunuu o loo aafia i gasegase lē pipisi. Ae o le tausaga na tea nei na faaopoopo ai foi le auaunaga a le Falemai Faamamā Toto i afioaga i tua. Mafua lea itu ona na faaalia e le susuga Mulipola, e tāua tele le iloa ma le malamalama o le atunuu, e ogaoga tele le maua ai i gasegase o le faaletonu o le fatuga‘o ma o le vave ona iloa o le aafiaga e ono oo i ai le tagata, atonu o le vave foi lea ona faia o se galuega e togafitia ai le tagata a o lei oo i tulaga faigata ia o le faamamāina o le toto. O le to‘a 100 ma ona tupu o loo ua faamauina nei e tailua aso ma agai i le falemai lea i Motootua mo le faamamāina o le toto. “O le toatele lava e i le va o le 50 ma le 60 tausaga le matutua, ae ua tele lava foi le faaopoopoga o i latou e laiti atu,” o se faaaliga lea a le Alii Pule. O le alii laititi lava lea na faamamā le toto e suafa ia Sio na maliu i le masina na tea nei. O le faaopoopoga ua vaaia nei e le aufaigaluega e tusa lea ma le to‘a 14 lava le numera e siitia ai le aofai o nei gasegase i le tausaga e tasi ma e toatele tele lea numera pe a fuafua i le faitau aofai o tagata Samoa. O le galuega a le Matagaluega o le Soifua Maloloina o loo faia nei o le saga faamamafa lea i faasalalauga tuuina atu ma a‘oa‘oga o loo faasavali nei, le suia o le soifua o le toatele, mai i taumafa e tausi ai i aso uma, i le taofi o le taumafa tapaa ma le faamalosi tino e tatau ona faia i aso uma.
“A lē suia lava le vaavaai a le atunuu i le tausiga o lo latou soifua maloloina e faigata foi ona faia i ai se isi suiga ma o le iuga lava lea o le toatele ua ogaoga tele o latou gasegase, o le manaomia lea o le faamamā o le toto,” o se saunoaga lea a le Alii Pule. E lē taulia ai i le silia lea o le to‘a 120 ua togafitia i Motootua le isi toatele lea e i atunuu e pei o Niu Sila mo nei togafitiga, o nisi ua faatalitali mo se taotoga e mafai ai ona maua se fatuga‘o maloloina e soifua ai ma aveese ai le ola faalagolago i le tau faamamāina o le toto. O le malo o Singapore lea na talosaga i ai le Malo o Samoa mo se fesoasoani i le faatuina o le Falemai Faamamā Toto ma o le tele lava o le tupe o loo faaalu i le faatauina mai o masini ma le faaleleia o nofoaga auā lenei auaunaga o loo faatupe uma e le Malo. Ua tele foi faalapotopotoga ma mafutaga a Ekalesia Kerisiano i Samoa ma fafo, ua momoli faaletausaga mai i lea Falemai fesoasoani tau tupe auā lava le mautinoa e faaauau lenei togafitiga. E ui e taugata lona faatinoga, auā e pa‘ū le tupe e totogi e le gasegase o loo nofo i Samoa nai i lo gasegase e malaga mai atunuu mamao, ae e faitau miliona seleni moomia i tausaga uma mo lenei tautua. O le finagalo o le Malo e pei ona muai faaalia, e ui foi i nei miliona e faaalu i lenei taumafaiga, ae ua faaitiitia lava le tupe e alu i le faamamāina o le toto talu ona faavae lenei falemai ona o le taugata o le tupe e totogi ai le malaga o le toatele i fafo aemaise i Niu Sila poo Amerika Samoa auā le faamamāina o le toto.
Ua faaauau se isi polokalame a le Falemai Faamamā Toto ua talosaga ai le atunuu e ofi atu i ai – a o lei maua i le faaletonu o fatuga‘o. O lea polokalame e siaki ai lava le tagata i vaiaso uma ma fautuaina galuega e tatau ona fai ina ia aua ai ne‘i oo i le faaletonu o le soifua maloloina. Ua iai nisi ua mafai ona faamanuiaina ai ae o isi ua tele ina tuai ma oo lava ina faamamā ai le toto. O le aufaigaluega ua oo atu i le to‘a 34 ma le faamoemoe ina ia lava i latou e tautuaina le faatuputupulaia pea o le numera o le atunuu ua maua i lenei gasegase matautia.
