O le tausaga ua mavae 2018 na amataina ai se polokalame ua faaigoaina o le Diversity Festival i le itu i Saute o Aukilani e faapitoa lea mo atunuu uma o le lalolagi o loo nonofo o latou tagata i South Auckland. E 15 atunuu sa mafai ona auai i le uluai polokalame lenei i le tausaga ua mavae, ae o le tausaga nei ua lua i ai tausaga talu ona faatautaia lenei faamoemoe, ua siitia atu ai i le 25 atunuu o lea ua mafai ona latou faatāuaina lea avanoa ma lea polokalame e faalauiloa ai a latou tu ma aganuu a latou atunuu taitasi. E lē gata la i le faatāuaina o tu ma aganuu ae o loo maua ai foi le avanoa e faalauiloa ai taumafa ma faatauina atu auā le silafia e nisi o tagatānuu o meaai a atunuu taitasi.
O le Aso Toonai ua mavae, e moni sa louloua le tau ma tetele timuga ae lei tuua ai le agai atu o tagata o atunuu taitasi o le lalolagi o loo aumau i le itu i Saute o Aukilani e faailoa a latou aganuu e ala ia latou siva, o laei sa faatauina aemaise o meaai i lenei polokalame.
Ua felanulanuai tu ma aganuu a atunuu taitasi aemaise ai o gagana ma lanu i totonu o Manukau i le faaiuga o le vaiaso a’o taumafai Papatoetoe Local Boards ma Otara Local Boards e tuufaatasi lenei faamoemoe ina ia mafai e tagatānuu uma o le komiuniti ona maua le nofo fealofanu ma le galulue faatasi i totonu o Niu Sila, auā o le tasi lea tāua o le polokalame o loo iai.
O Local Boards nei e lua o loo mafai ona galulue faatasi e lagolagoina lenei faamoemoega tele. E tasi le aso o le polokalame na amata mai i le 10 i le taeao seia paia le 6 i le afiafi. E tele faafiafiaga eseese sa iai ae na tatala lava i le tu ma aga i fanua a tagata Maoli e pei ona masani ai tuufaatasiga ma polokalame faapenei i totonu o Niu Sila. O le susuga ia Lorenzo Kaisara sa fai ma fofoga o le aso, ae o le ausiva a le Tipaula, o le Le La o Samoa Dance Group, Tatau Dance Academy ma le La o Samoa Dance Academy sa fai ma sui o Samoa i totonu o nei faalagamaea a le Diversity Festival i Aukilani i Saute i lenei tausaga. E tele kamupani eseese sa faalauiloa a latou oloa, ae sa filofilo ai foi ma nisi o kamupani a Samoa e pei o le SSAB faatasi ai ma nisi o kamupani sa faalauiloa a latou tautua ma auauaga i totonu o Niu Sila e pei o a’oa’oga ma galuega.
O le saogalemu o le isi lea vaega sili ona tāua i polokalame tumutumu faapenei, o le tāua lea o le galuega vaavaalua a le ofisa o leoleo, o le Council ma nisi o ekalesia sa galulue faatasi ai i lea aso na maua ai le toafilemu i totonu o le lotoā a’o faagasolo polokalame taitasi.
O le tausaga fou o loo taoto ai se isi laasaga fou e agai i ai Papatoetoe Local Boards ma Otara Local Boards e tatau ona oo atu i ai ua lua ni stage e faaaogāina i polokalame taitasi, auā o lea ua maitauina i fuafuaga o lenei tausaga ua faatuputupulaia le tele o atunu ua auai, ma e iai le talitonuga e oo atu i le tausaga fou ua iai foi isi atunuu ua toe faaopoopo mai ona lē lava lea o le taimi e faatino ai le tele o vaega a le Diversity Festival mo lenei polokalame.
