O se vaaiga fiafia ua molimauina i Niu Sila ma nisi vaega oi Ausetalia, le toatele o tagata ua manaomia tele le pia o le Vailima faapea le Taula ma le Manutagi. O se tala fiafia na molimauina ese malaga a ni alii Samoa ua toe taliu atu i Niu Sila i aso malolo o le Kirisimasi.
Na faaalia e le susuga ia Semisi Uati e lē taitai ona lava le Pia a Samoa o loo faatau i Niu Sila, o le tele o faaiuga o vaiaso e fiu e taamilo i faleoloa e masani ona faatau ai, o le tali ua leai se mea ua uma.
O le isi lea galuega tele a le komiti o la latou aulakapi, o le taamilo pea i le faaiuga o le vaiaso, e saili lava ia maua se sefulu pusa Vailima poo le Taula.
O le faaseā ua faaalia mai, pe aisea e lē tuu ai ia lava e mautinoa o le isi afa o tagata Samoa e fetaufetulia‘i solo e fia maua le pia a Samoa, na o tala faalogo ae taunuu atu i faleoloa e faapea o loo faatau ai, o le tali ua mae‘a.
E matuā fiu e saili se pia Vailima ma le Taula i faaiuga o vaiaso pe a mae‘a taaloga ua manaomia lea faamalositino mo le talatalanoa e pei lava ona msani ai.
E iai nisi faipisinisi ua latou taumafai e taofiofi le faatauina i tua o le Vailima ma le Taula, ona latou faatau atu lea i se isi tau maualuga i le vivini o moa o le a lata ina ao.
O le ā lava le taimi e faatoa maua ai se avanoa e faatau ai le Vailima ma le Taula i Niu Sila, e lē foi le nanamu o le malosi o lenei ‘ava e saili lava faatoa maua se filemu pe a faamanuiaina.
O le vaiaso nei na faalauiloa ai e le afioga i le Sui palemia, le tulaga solosolo manuia o oloa faatau atu a si o tatou atunuu i Niu Sila ma Ausetalia, ua talafeuga ma le faaseā ua faailoa mai i nisi o le mamalu o le atunuu o alala ma afifio i Niu Sila, fai mai e lē lava la tatou pia o tuu i faleoloa o Niu Sila.
E ui i nisi oloa a si o tatou atunuu o faalauiloa i totonu o Niu Sila ma Ausetalia, e pei o le apa peepee, o le koko Samoa, faguinu ma isi, ae lē taitai ai lava ona faamalieina le manao o le au taumafa ava, e lē lava le Vailima ma le Taula o faatau i faleoloa o Niu Sila.
O le masina fou ua faalauiloa mai o le a auai atu ai Samoa i nisi o faaaliga oloa e faia i Ausetalia. Ia tatou talosia ia tele ni maketi e faatauina a tatou oloa, ma maua ai foi nisi mau faleoloa, e faatau ai le Vailima ma le Taula, o la tatou avefu‘a sili lea ona saoasoa ua molimauina e le toatele o tagata.