E lei manuia fesootaiga i le matagaluega o leoleo poo fea ua fai iai a latou suesuega faasaga i alii ma faipule o le afioaga o Malie, lea na tusi ai le Matagaluega o Faamasinoga e talosaga mo le faatinoina o moliaga faasaga ia Papalii Faamausili Moli Malietoa ma alii ma faipule o Malie ona o le lē usitaia o le poloaiga lē tumau o le aso 16 Aokuso 2018 e taofia mai ai le faafotu tupu i le suafa Malietoa.
E leai se faamatalaga ua aumaia, peitai na ta’ua e se tasi o matai o loo aafia ai lona suafa i le lisi o le talosaga a le matagaluega ua ave i leoleo, na ia faalogo iai peitai e leai lava se mea ua oo atu ia te ia, o ni moliaga ia po ua oo atu foi leoleo e fai ni a latou suesuega.
O le aso 18 o le masina nei lea ua fuafua e fofogaina ai le mataupu i le faamasinoga ma e lua ni vaega tāua o le a agai iai le suesuega o le mataupu lenei, e aofia ai poo fea tonu le nofoaga sa’o e tatau ona faatino ai le faafotutupu.
E lē gata i lea o le suesuega o le mataupu o le a aumai ai se faaiuga a le faamasinoga, i le nuu poo le afioaga sa’o e tatau ona lesitala ai le suafa Malietoa.
E ese mai i le talosaga apili ua faatulagaina a’o lei mae’a le tausaga lenei, o suesuega tau faamasinoga e faaono mapuna ane i le faamasinoga faaitumalo aemaise o le faamasinoga maualuga poo le Supreme Court, i ni mataupu fou poo ni mataupu tuai tau tulafono o loo faaauau pea ona fai ma lape i le faanofotupu o le suafa Malietoa.
O mataupu faaletulafono tau i le lē usitaia o poloaiga lē tumau, o tagi faaulu i le Faamasinoga o Fanua ma Suafa, o nisi o mataupu i le faamasinoga maualuga e faatatau lava i le suafa, o loo tālia uma le aso e faatino ai.
I le molimauina o le faanofotupu na faatino i Malie ua mapuna ane ai ma isi talosaga fou e lua i le faamasinoga, e ese mai ai talosaga ia na afua ai poloaiga lē tumau a le faamasinoga.
O lona uiga e pei ona maua e le tusitala vaega fou e lua o le a agai iai suesuega a le Faamasinoga o Fanua o Suafa e aofia ai le finauina o le nofoaga sa’o e faatino ai le faafotutupu aemaise poo fea tonu le afioaga e lesitala ai le suafa Malietoa.
E lē gata i lea o le a silasila foi le faamasinoga i le finauga mai Afega o le suafa Malietoa e tatau ona faaee i Faleata. I le faatalanoaga a le autusitala ma le afioga Maualaivao Pepe, na ia faaalia manino ai, e feteena’i le poloaiga lē tumau ma le faaiuga a le faamasinoga i le tausaga talu ai, e tatau ona faaee le suafa Malietoa ia Faamausili a’o lei mae’a le tausaga lenei.
E pei ona ta’ua, o le aso 18 e toe fofogaina ai le faamasinoga e toe iloilo i le faamasinoga o Fanua ma Suafa, o loo talosagaina ai le silasila a le faamasinoga ina ia talia le toe lu’iina e itu o le faamasinoga o le faaiuga o le faamasinoga lea na fai i le tausaga ua mavae.
O lona uiga afai ae talia le talosaga lenei, o le a toe fai atoa le faamasinoga o le suafa Malietoa.
E pei ona silafia o le Susuga Malietoa Tanumafili II, ua tuumalo o le Malietoa mulimuli, o lona atalii o Papalii Faamausili Moli, ua tele tausaga o tauivi i lona faaauauina o le suafa Malietoa, ae o le tulaga mautinoa lava, e lē taugofie i lona aiga le faatupega o saofai e lua e pei ona faatino i le malae o Vaopipi i Malie.
