Ua toe lalaga a‘e lagona tiga ma le matuitui o le fasi a le oti i aiga ma fanau a le tina o Laumoe Seuala o Lalomanu Aleipata, ma toe manatua ai sauaga malolosi a le galulolo na fano ai soifua o le to‘a 49 o tagata o Lalomanu ua faamauina o latou suafa i le maa faamanatu ua faatuina i luma ane o le malumalu o le EFKS a le afioaga.
O le Aso Lulu na tea nei 29 o Setema 2010 na faia ai sauniga lotu faamanatu o lea faalavelave matautia, ma sa tumutumu ai malumalu tapuai o nuu ma afioaga na aafia e aofia ai le EFKS a Lalomanu.
O se tala faanoanoa na faateia ai le afioaga ina ua logoina atu le maliu o le tina o Laumoe sa faataotolia i le maota gasegase o Tupua Tamasese Meaole i Motootua ona o manu‘a mai le galulolo.
Ua 78 tausaga o lona soifua ma o ia le isi tagata pito i matua le soifua na aafia i le sunami.
Ua tagi ai le fatu ma le eleele ma pogisa le lagi ona sa tapuaia e fanau ma aiga faapea le nuu ona mafatiaga, peitai na toe amia e lona matai i le aso tonu na atoa i ai le tausaga o le galulolo ma le mafuie.
Ua faaopoopo ai le numera o le au maliliu i le sunami ma le aofaiga o tagata Lalomanu ua amia o latou agaga ona o le faalavelave faalenatura, lea sa 49 ae ua lima sefulu i le tina ia Laumoe.
O le a tumau i le tele o tausaga o lumanai lagona faagalogata o le faalavelave mo nuu ma afioaga o Samoa na aafia. E faapena foi lagona alofa ma lagona nutimomoia o le alofa faamatua i fanau, aemaise o fanau i o latou mātua na tuumalo, usufono ma maliliu i le faalavelave faalenatura.
O se tasi o le aiga o le tina ua maliu, le afioga i le faipule o Aleipata Itupa i Luga, Tauā Kitiona Seuala o le minisita foi o Faatoaga ma Faigafaiva, na ia faaalia lona faanoanoa i le tala ua momoli atu i le aso tonu o loo faavauvau tiga le nuu ma le afioaga ona o ē pele na amia ona o le galulolo.
E tuuina atu lenei lipoti mo le faasalalauina o loo faia tapenaga a le aiga mo toe sauniga o le tina. Tau ina ia faamaise le agaga faamafanafana o le Atua i fanau ma aiga, o uo ma aumea mamae ona o se tasi ua valaauina sa aafia lona soifua i mafatiaga ona o sauaga a le galulolo ia Setema 29 o le tausaga ua mavae 2009.
