Faaopoopo tagata faigaluega fua mai i Ausetalia

E toatolu ni tamaitai mai Ausetalia ua amata i le vaiaso lenei i galuega ua ofo fua mai ai lo latou taimi e fesoasoani ai i nisi o Ofisa o le Malo mo le isi tolu tausaga.

O avanoa nei ua talosaga ai Matagaluega ma Faalapotopotoga a le Malo mo i latou e iai tomai faapitoa ina ia galulue ma fesoasoani ai i ia ofisa.

O le pulega o tagata tafafao maimoa mai i fafo na talosagaina nisi e iai tomai faapitoa i le tomai o le laveai o tagata e tulai mai ai faalavelave faafuasei, aemaise lava i ogasami o le atunuu poo nofoaga o iai matafaga (Lifesaving).

O Niu Sila ma Ausetalia e malosi lava le vaavaai i ituaiga auaunaga nei e pei ona vaaia i le tele o matafaga, e iai lava le nofoaga e galulue ai alii ma tamaitai e faatautaia galuega nei o le lapatai o tagata tafafao i sami o ia atunuu, aemaise o le nofo sauna i le ono aafia o nisi e feausi ai i ia nofoaga.

Ua faato‘ā mae‘a se tauvaga o ia tomai na faia mo tagata faigaluega o faletalimalo aemaise o mataaga tu matafaga.

O lea la ua agai mai ni tamaitai se toalua mai i ia auaunaga mai i Ausetalia e fesoasoani i aoaoga a le Pulega o Tagata Tafafao i Samoa.

O Erin Doyle ma Emily Cox, o i laua ia ua amata nei galuega o fesoasoani muamua i le atunuu. Faaalia e le tamaitai o Erin Doyle, o le taimi o le a iai i Samoa e iai lona manaoga ina ia faamautu ni polokalame o fesoasoani muamua aemaise o tomai nei o le laveai o soifua mo aoaoga i Samoa.

E 14 tausaga o galue lea tamaitai i le faalapotopotoga lea o le Surf Lifesaving i Ausetalia ma na ia ta‘ua e moomia tele e le atinae o tagata tafafao mai nisi e galulue ma mafai ona vave le fesoasoani i le ono tulai mai ai o ni faalavelave i nofoaga e tumutumu ai tafaoga.

O le isi tamaitai o Emily Cox o se faiaoga i le Surf Lifesaving i Ausetalia, na ia ta‘ua o le a taumafai faatasi ma Erin ina ia faamalosia polokalame nei, ae e iai le manaoga e tatau ona faalautele aoaoga nei i soo se tasi i Samoa.

I lona faato‘ā oo mai i Samoa, na ia faaalia ai le malosi o fesootaiga o aiga, ma na ia faaalia o totonu o aiga e tatau ona amata mai ai le aoaoga lenei o le tomai e laveai ai soifua, ma e tāua le iloa e tagata uma o nei tomai.

O lana faamatalaga, o le ituaiga fesootaiga lea e mautinoa lona manaoga ina ia maua e aiga ma tagata Ausetalia.

O le tamaitai lona tolu ua amata i Samoa i le Faalapotopotoga ua nafa ma faalauiloa ma galuega i le gasegase o le HIV/AIDS poo le Samoa AIDS Foundation.

O Charlotte Pickering o se tamaitai na galue i Ausetalia i lea faalapotopotoga ma o se tasi ods faalapotopotoga tumaoti laitiiti i Samoa e ui o le tele o galuega faalauiloa ua o latou galulue faatasi ai ma le Matagaluega o le Soifua Maloloina faapea ai le Faalapotopotoga o le Koluse Mumu. O le iai o lenei tamaitai o le a fesoasosani ai i galuega faaofisa a lea Faalapotopotoga ma faatautaia ai polokalame faataatitia aua faalauiloa a lea faalapotoptooga ma le faatinoga o siaki mo le atunuu.

O le iai o nei tamaitai i Samoa o le a mafai ona nonofo ma aiga Samoa ma o le a avea ma sui o ia aiga.

Faaalia e lenei tamaitai o se taimi tāua le iai i Samoa e ofo mai lona foi iloa ma faasoa i le Samoa AIDS Foundation ma o lona manaoga ia mae‘a lona taimi i Samoa ua mautu polokalame aua galuega moomia i le faaitiitia o lenei gasegase mai i le pepesi i Samoa.

O loo faaaauau galuega a isi tagatanuu o Ausetalia ua ofo mai foi o latou taimi e galulue fesoasoani ai i Samoa, ma o le toatele o loo galulue mo ofisa o le Malo e pei o le Ofisa o Aoga, Ofisa o Faamasinoga, Ofisa o le Loia Sili ma vaega eseese o le Tulafono.