Faaopoopo potu o faletalimalo mo tagata tafafao

O loo sauni le atunuu e talimalo i se fonotaga tele e silia i le tolu afe tagata mai fafo o le a auai i le tausaga fou. O se tasi lea o tapenaga tele a le Malo ma le atunuu, aemaise lava ile itu i nofoaga e faamautu i ai le toatele o usugafono o le a malaga i le atunuu.
E ui ina faapea e lē o lava potu o faletalimalo mo lea taligamalo ma fuafua ai le aumaia o se meli la‘upasese tele e taula i le uafu i Apia ae nonofo ai nisi o ia usugafono, ae o lea ua faailoa e le pulega o tagata tafafao o le a faaopoopo nisi potu ile va o le 200 ma le 300 ile tausaga fou, pe a tatala se tasi o faletalimalo tu matafaga i Manono tai, ma le toe tatala o le tautua a le faletalimalo lauiloa o Aggie Grey i Vaisigano i Apia.
O le Manono Islands Retreats o se pisinisi faletalimalo a le afioga Mulipola Louise ma lana paga o David Mains, ma o loo galueaina i le taimi nei ma le faamoemoe e tatala ma amata faaaogā i le taulotoaiga o le uluai kuata o le tausaga fou.
O se tasi lea o atinae fou tau tagata tafafao ua manatu le pulega o tagata tafafao o le a fesoasoani tele i tapenaga aemaise o malo tafafao mai fafo e afea le atunuu mo malologa ma evaga faasamasamanoa i le fia silasila ia Samoa o se atunuu laititi o le Pasefika ae ua aave ona tala i le tele o mea matagofie o loo iai. I le faamoemoe o le Malo i  se meli la‘u pasese e nonofo ai nisi o usugafono a atunuu laiti, o sui o Malo Aufaatasi e talanoaina ai fuafuaga mo le puipuia o atunuu laiti mai fesuiaiga o le tau, ua manatu se tasi o tamalii o loo faauluulu i ai le sosaiete o le siosiomaga o Fiu Mataese Elisara, e lē talafeagai.
Ua faaalia e lea tamalii e sili atu ona tāua le nonofo o tagata o lea usugafono i aiga ma nuu o itumalo eseese o le atunuu latou te maua ai se mafutaga lelei ma tagata.
O le a latou maua ai faiga o a tatou tu ma aga aemaise o le a silasila ai foi i le eseese o le nofo i le faletalimalo ma le nofo i se aiga Samoa aua e silisili foi ona tausaafia le ola talimalo ose aiga Samoa e le gata o le laufofoga fiafia, ae o taumafa Samoa.
O le faaopoopoina o potu o faletalimalo mo tagata tafafao o se isi lea tulaga lelei i tapenaga mo lea fonotaga tele faavaomalo o se taimi muamua o le a usuia i lo tatou atunuu, e pei ona mae‘a ona faamausaliina lea taligamalo ina ua asiasia e sui sinia o Malo Aufaatasi i se latou malaga talu ai nei i Samoa.