O le taulotoa‘iga o le masina o Oketopa na maliu faafuasei ai se tama talavou a o iai i luga o lana galuega ina ua taia e le nofoaafi a o talanoa i lana telefoni feaveai. O loo faagasolo pea galuega o le faalauteleina o le taulaga faatau fou i le aai o Takanini i le auala o Walters Road, ma o le vaega tonu lea na iai le tama talavou lea ma galue ai i le taeao ina ua taia faafuasei e le nofoaafi ma uma ai lona soifua.
E tusa ma le 3 i le 4 vaiaso talu ona tea lea faalavelave matuiā ae toe maona ane le isi foi tamaitai talavou lava e na o le 12 ona tausaga, ua taia foi e le nofoaafi i le vaega e lē mamao mai le vaega na tupu ai le faalavelave muamua. O le aso lava na sosoo ai ina ua faamaonia le maliu o le tamaitai lea na toe taia ai foi se isi tama i le itu agavale o le auala o Walters Road i le auala o nofoaafi i le pitonuu lava lenei e tasi.
O se popolega tele i le siosiomaga o le soifuaga o tagata Maori, na a‘e ai se tofa i le tamaitai matua (whaea Maureen Blackmoore), ua tatau ona logo mātua matutua (nga kau-matua) o le komiuniti (community) e fai se fuafuaga auā ua alagatatau ona fai se (manawatanga) faapaiaina i vaega uma nei sa tutupu ai faalavelave i luga o auala o nofoaafi.
O le afiafi la o le Aso Sa i le itula e 2 na amata faasolo ai loa le faataunuuina o lea faamoemoe mai le auala o Walters Road, sosoo ai ma Taka Street, oo atu ai i Manuroa Road e faaiu i Sparton Road i totonu lava o le aai o Takanini.
I le mutinitini o le lā ae sa tilitili mai lava nga kaumatua auā le faapaiaina ma le fia faamanuiaina o nei vaega o auala o nofoaafi ma le talitonuga e lē tatau ona toe tutupu ai ni faalavelave e pei ona sa iai i le lua masina ua mavae atu nei.
E manaia foi ma matagofie lea faamoemoe i le maitau ona auā foi le faaauauina pea o tiute ma le talitonuga o tagata Maori auā na saunoa le tamaitai o Maureen, o se popolega tele i tagata fanua (tangata whenua) le faaumatia pea o soifua o tagata i lea vaiaai, ma ua alagatatau lava ona faapaiaina ma faamanuiaina mo le lumanai ina ia aua ne‘i toe afaina ai se tagata.
O le isi popolega tele ona o alo ma fanau ua faaaogāina lea auala e faaumatia ai lo latou soifua ona o faafitauli o le olaga o loo feagai ma i latou. E mae‘a loa le faataunuuina o lea faamoemoe i magaala uma e pei ona ta‘ua ma oo mai e malolo mo sina faamalositino i le aoga laititi i Kids Count Education Centre, ae totō ifo loa ma uaga ma na galulu foi le laueleele ina ua papa faititili a o faaauau ai pea lea sauniga i totonu o le faleaoga o Kids Count i Takanini.
Ia o le faamoemoe ma le fautuaga foi mo tagata lautele ina ia faaeteete, tagai lelei ma faaaogā lelei faailoilo e pei ona tusia ma faalauiloaina mo le saogalemu i taimi e kolosi ai auala o nofoaafi, aemaise ia tau mamao foi lagona ma manatu e faaaogāina luga o auala o nofoaafi e faaumatia ai le soifua.
