Faaopoopo pea faafitauli o le Soifua Maloloina

Ua sosoo vaiaso e tolu e le o mapu faitioga ma sailiiliga ua folafola e le Minisita o le Soifua Maloloina, le Afioga Gatoloaifaana Amataga Alesana Gidlow ua faatautaia e faatatau i le auaunaga faafomai a le matagaluega i Samoa.
O le tolu vaiaso talu ai na amata ai ona laga faitioga i se tina na fanau i le falemai tele o Malietoa Tanumafili II i Tuasivi ma maliu ai faatasi ma lana pepe fou.
O le lona fa lea o le fanau a le tina ae o lea ua maliu ai ma na ta‘ua e lona toalua e le talia faamatalaga ua tuu atu e le falemai e faatatau i le maliu ai o lona toalua ma le la pepe. 
O le taimi lenei ua agai le aiga o lenei tina i le faamasinoga mo se tali o le latou mataupu.
O le faatamala ua tuuaia ai i latou na tau atu i ai le tina.
O le po na taunuu ai le tina ae na faato‘a mafai ona fanau i le po o le aso na sosoo ai.
O le mataupu lenei na ta‘ua ai e le tamā o le aiga na fiu e talosaga se fesoasoani pe mafai ona taoto lona toalua ae alu atu le tali a tausi soifua na tau atu i ai, faapea fomai na mulimuli ane siakiina lona toalua, e leai se faafitauli o le fanau sa‘o o lona toalua.
O le fanauga a le tina na ta‘ua ai e le tama le tele tele o le palapala na alu (sei tulou) ma na agai i se faleoloa lata ane ma faatau se tapu taele o pepe auā le taliina o le tele o lea palapala alu.
Na talosaga foi ina ua ao le po na faato‘a taunuu ai ina ia ave lona toalua i Apia aua se taotoga ae logo atu pea ia ma lona tuafafine e aua le popole e fanau sa‘o lava lona toalua ma e leai ni meafaigaluega i Tuasivi e mafai ai ona faatino ai se taotoga.
E lei talia foi talosaga o le ave o lona toalua i Motootua.
Ua taatia atu nei la i le aiga le sailiga o le latou loia ua faalauiloa nei mo le faatautaiga o le latou tagi.
O le tali a le afioga i le minisita i lenei mataupu ua iai nei foi suesuega ua faatautaia i totonu lava ia o le matagaluega ina ia mafai ai ona saili le moni atoatoa o le mea na tulai mai.
O le isi mataupu i le vaiaso lava na te‘a nei o se ulugalii mai Satufia Satupaitea, lea ua ta‘ua e le tina ia Loata Fagalilo na malaga mai ma lona toalua i Savaii ona o le manaoga e saogalemu lana pepe e le mafai ona talia le malaia ai o si ana tama teine ona ua fiu e talosaga i le falemai pe mafai ona taoto, ona o lana pepe lona lua na taoto ai i Amerika Samoa.
Peitai o le tali na avane ia te ia e aua le popole o loo mafai ona toe fanau sa‘o. E foliga mai o finauga nei e lua e pei ona iai le isi lipoti atoa ai ma le lipoti lenei ua talosaga ai tina mo taotoga ae ua fautuaina pea le fananau sa‘o.
O le faaiuga lava e pei ona silafia e tele lava ina aumai i le falemai ia i latou ua iai le tomai faapitoa i nei ituaiga taotoga ma togafitiga, ae mo tina nei e lua ua le talia fautuaga ae o lea ua maliu ai le isi tina ma lana pepe fou ae o le tina ia Loata ua sao mai ia ae o lana pepe lea ua fanau mai ua maliu.
Ta‘ua e lenei tina i tusitala le faigata tele o le fano ai o si ana tama ma o le taimi mulimuli lava ua matua le mafai ona tatali ona tiga a o taumafai fomai e faaaoga se masini i le faafanauga o ia na toso ai loa i le potu tipitipi aua le taotoga na vina ai.
Ta‘ua e le tina le te‘i ane ua mae‘a le taotoga ae oo atu le fomai ma le faamatalaga e lototele ua malaia lana pepe fou. “E uma lo‘u ola o o‘u faanoanoa i le mea ua tulai mai, aemaise o lea lava na sosoo talosaga e fai so‘u taotoga ae le talia e fomai”. Ua suesue foi lenei mataupu e le matagaluega ina ua maua lipoti i le faasea a lenei ulugalii.
O le mataupu lona tolu, ua taoto nei i le Potu Tigaina i le falemai tele i Motootua se teineititi e lua ma le afa tausaga le matua e igoa ia Elisa Mika o Vailima.
O ona mata ua fusi faataamilo, ua taofiofi ai le tulaga matautia ua oo i ai mata o lenei teineititi ua agai mai i fafo o ona laufofoga sei tulou, ma a matala ua sinasina mai ai le toto. E ese nei vaaiga ma e na o le faamomoiloto pe a molimauina e soo se tasi.
E le mapu le oi o lenei teneititi ma e mafua mai i le fula i totonu o lona ulu na amata mai i lona taliga.
Faaalia e matua o lenei teineititi, o le masina o Novema o le tausaga ua te‘a na vaaia ai le fula i le taliga o le la tama ma agai loa i le falemai e siaki.
Na avane fualaau e togafitia ai lenei fula ma le manatu ai lava na o se fuafua o oso vale ai i totonu o le taliga o Elisa.
Na faaauau ona ave le teineititi i le falemai ina ua vaaia e le o aoga fualaau na avatu ae o le tali lava lea e ave fualaau e togafitia ai.
O le saili pea o matua na oo atu ai i se falemai tumaoti aua lava le saili o se isi finagalo faafomai i le fula ai pea o le taliga o Elisa ma ua amata ona tagi i le tiga o lona ulu ma ua faasolo ane le fula i le isi itu o ona foliga.
Mae‘a le tausaga e leai lava se tali ma o le falemai tumaoti na talosagaina loa le faata faapitoa e saili ai poo le a tonu le fula lea ua tulai mai. Faaalia e lenei ulugalii o le tali na avane i le fomai tumaoti lea, o loo faaletonu le masini e faatino ai faata nei o le ulu o si a la tama.
Na toe foi i le aiga ma na faasolo lava ina matua tigaina le teineititi ma toe ave foi i le falemai tumaoti lea. Toe talosaga le fomai i se faata faapitoa, ae foi mai lava le tali e le o lelei le masini.
O le vaiaso la na te‘a nei lea na faatoa toe lelei ai le masini ae avatu Elisa ua matuā iai i se tulaga faaletonu lava ma ua fautuaina foi matua e le toe foi i se lelei le gasegase o le la tama.
O le taatia ai la o lenei teineititi i le falemai i le potu tigaina ua na ona togafitia lava o iai mai i tiga ua feagai nei ma ia ae ua na o le faatalitali lava i le uma o lona ola.
Na fesiligia le ulugalii poo le a tonu lava le gasegase lea ae ta‘u mai o le fula lea o le tumor ua aafia i le kanesa ma e leai se isi auala e mafai ai ona toe togafitia le teineititi.
Na tau le mafai ona talanoa mai matua i le ita tele ona o lenei tulaga ua oo i si la tama teine faato‘a lua ma le afa tausaga le matua ona o le tuai lava ona fai i ai se togafitiga a o lea ua leai se faamoemoe mo Elisa.
E lei iai se tali mai a le tautua faafomai i lenei mataupu sei vagana ai le matau pea o le teineititi a o taofia ai i Motootua i le taimi nei.
O talosaga a le atunuu ua fautuaina mo lenei alualutoto. Na matua faasa foi le tatou ofisa ona pue se ata o le teineititi a o asiasi atu i ai i le potu tigaina.