Faaopoopo mataupu e a‘oa‘o i aoga Tulagalua

O le mafuaaga tonu lea o loo fai ai ma mālōlō vasega i Aoga Tulagalua uma, ona o ni a‘oa‘oga o loo faagasolo mo faiaoga i le suiga o mataupu a‘oa‘oina (curriculum) o le a amata i le tausaga fou.

E lima mataupu na sau ai le tauaveina o le vasega tasi i le vasega valu, ae ua faaopoopo nei mataupu e lua, ua fitu i ai mataupu e tatau ona a‘oa‘o ai le fanau i le vaiaso. O loo faagasolo la ia a‘oa‘oga mo faiaoga i Itumalo taitasi agai i mataupu e lima na sau ai ma mataupu faaopoopo e lua, o le Faamalositino & Soifua Maloloina ma le mataupu ua faaigoaina o le Expressive Art ua tuufaatasia ai le tusiata, musika ma le siva.

O mataupu e lima ua iai, o le Gagana Samoa, Faasaienisi, Matematika, Faaperetania (English) ma le Social Studies e a‘oa‘o i aso aoga e lima ae o mataupu faaopoopo o le Faamalositino & Soifua Maloloina ma le Expressive Art e na o le tolu aso o le vaiaso e faia ai mo vasega uma, vasega tasi i le vasega valu.

I se faatalatalanoaga ma le Asiasiaoga (School Review Officer) o le Itumalo a Vaimauga, susuga Olosau Simanu na ia faaalia ai, o le a faamalosia lea suiga fou i aoga uma a le Malo pe a aulia le tausaga fou.

Na ia faaalia, o a‘oa‘oga mo faiaoga o loo aofia ai ma nisi o sui o Aoga a le Katoliko ae e lē o mailoa pe o iai ni isi aoga tuma‘oti o loo aofia ai.

“E tolu lava aso o le vaiaso o le a faia ai vasega mo mataupu e lua ua faaopoopo ma o le a taumafai foi e sui le taimi ma le umi o mataupu ina ia fetaui ma isi mataupu ua iai,” o se saunoaga lea a Olosau.

Ua fautuaina foi faiaoga o aoga taitasi ina ia lava tapena i le tauaveina o mataupu o le Faamalositino & Soifua Maloloina atoa ai ma le Expressive Art poo le mataupu lea ua unai ai le tomai i le tusiga o ata, tusiga o solo, o le faatinoga o tala ma isi tomai faalemafaufau o loo a‘oa‘oina ai.

O aoga la ua faatautaia i le taimi lenei e mo faiaoga uma e lē gata i le lava tapena mo tomai i le a‘oa‘oina ma le faatinoina o ia mataupu ae ia lava tapena foi i le itu o alaga‘oa (resources) e pei o laei e faaaogā e le fanau i ia mataupu ma mea e faaaogā.

O se faataitaiga, o alaga‘oa uma e manaomia mo le mataupu o le Faamalositino & Soifua Maloloina, o laei o le fanau, o se laau pese e faaaogā atoa ai ma nisi o alaga‘oa e manaomia mo le faatinoina o ia mataupu.

Ta‘ua foi e Olosau, mo le mataupu o le Faamalositino & Soifua Maloloina e tatau lava ona talafeagai faatinoga poo faamalositino e fua i le malosi o le fanau.

O se taumafaiga lea ua tuu i ai le lagolago a le Matagaluega o Aoga mo aoga Tulagalua uma, ma o le talitonuga lava a le Matagaluega, a gaioi le tino ma soifua maloloina, e ola foi le mafaufau ma e lē faatupu ma‘i foi.

Talu ai foi ona o nisi o faamatalaga e faapea o le a lē toe iai nisi o Kolisi e pei o le Kolisi o Samoa, Avele ma Leifiifi, na tapa ai foi se finagalo o Olosau e uiga i lea tulaga.
Ae na ia ta‘ua, e mo‘i ua iai se fuafuaga faapea ae o loo faaauau pea le faia o le Suega autū mo le vasega valu mo Tulagalua uma.

Na ia saunoa foi, o le faamoemoe o le Matagaluega o Aoga, se‘i vaganā ua avea ma Kolisi nisi o Aoga Faaitumalo (Secondary Schools) o loo i nisi o afioaga ona mafai loa lea ona faataunuu lea fuafuaga.

O le suiga fou ua faataatia mo mataupu a‘oa‘oina mo le tausaga fou, ua faaavanoa ai Aso Lua, Aso Lulu ma Aso Tofi i a‘oa‘oga mo faiaoga ma e aua‘i mālōlō ai vasega i ia aso e tolu.