O le afioga i le Minisita o Faamatalaga Tekonolosi afioga Afamasaga Rico Tupai na tatalaina le uluai faasalalauga a le Samoa Go FM

O Samoa le atunuu o le Pasefika ua sili ona tele pisinisi tau leitio faasalalau ua faagaioia ai, pe a fua i le faitau aofai o ona tagata e pei ona faamauina ua lata i le luaselau afe. 

O tausaga ua mavae sa na’o le leitio a le Malo le 2AP sa faasalalau i le alaleo o le AM. Ae ina ua mua i malae le kamupani o le Leitio Polenisia i le faatuina o se leitio lona lua ua faaaogā ai le alaleo o le FM, o tausaga mulimuli ai ina ua tuanai le sefulu tausaga o lea alaleo poo se ualesi faasalalau ua silia nei ma le sefulu leitio faasalalau i luga o le FM lea foi ua faaaogā ai e le leitio a le Malo lea lava alaleo faasalalau e faaopoopo i le alaleo o le AM. 

O lea foi la ua tatala se isi leitio o le Samoa Go FM na amata ona fuafua lona faatuina e le susuga Atanoa Herbert Crichton ma se tasi o faipisinisi i le tausaga ua mavae.

O le masina o Me sa fuafua e tatala ai, peitai na toe tolopo ina ua taofi e le ofisa o le Pule Faatonu poo le Regulator a le Malo le amata o ana faasalalauga, ona o le alaleo o le 88.0 a le Go FM ua faaletonu ai faasalalauga o fesootaiga tau vaalele a le Pulega o Malaevaalele i lona nofoaga faatonutonu poo le Airport Tower o loo i Faleolo.

I le tatalaina o le Go FM na faailoa e le alii pule le susuga Atanoa, o se isi lea itu sa sili ona faigata ma avea o se lu’itau ona sa toe faatino nisi galuega i le aumaia o ni totoga mai fafo e togafiti ai le faaletonu sa atugalu i ai le Pule Faatonu. 

O le tuanai o se masina ma vaiaso ae mae’a galuega ma matala ai loa le faitoto’a mo le amatalia o faasalalauga a le leitio. 

O se tasi o maota o loo i Fugalei faafeasaga’i ma le Pat Ah Him mall o loo faagaioia ai mai ai le Go FM i le vaega i luga o lea fale sa iai le pisinisi o le Pro Com i tausaga ua tuanai.

O le faafetai a Atanoa ona o a latou paaga faapisinisi i le mau pea o le faatuatuaga a’o toe faatino galuega e faaleleia ai le faaletonu na tuai ai ona tatala ma amatalia faasalalauga a le leitio. O le faamalosiau foi lea a le afioga i le Minisita o Fesootaiga le afioga Afamasaga Lepuia’i Rico Tupa’i, i le pulega ma le aufaigaluega a le Go FM, ia mataala i soo se taimi aemaise o le autū o le tautua o le logologo o le atunuu e ala i faamatalaga eseese e faasalalauina faapea isi polokalame e auauna ai i le faafofoga a Samoa. 

O le susuga Atanoa Herbert Crichton sa galue muamua i le Leitio Polenisia mo ni tausaga a’o lei galue i le TV Samoa a’o pulea e le Malo. Na ia tuua lea auaunaga tau faasalalau sa galue ai i le vaega o maketi ma see atu galulue ma se tasi o faipisinisi lauiloa o le atunuu le susuga Joe Keil ua tuumalo ma faatu ai le faletelevise o le TV3. 

Na ia tuua lea auaunaga sa avea ai ma pule o lea faletelevise ma amata ai ona mafaufau e faatu se leitio FM e pei ona tatalaina nei. Ua atoa ai nei i le Go FM le 12 o leitio ae sefulufa alaleo FM ua faaaogāina. 

O le Leitio Polenisia i Savalalo e lima ana alaleo faasalalau. O isi leitio FM o le Samoa FM, Mai FM, o le leitio o le 2AP FM e lua ona alaleo FM, o le Leitio FM a le ekalesia Katoliko, ekalesia Worship Center lua foi alaleo FM, o le Lau Fou, Samoa Go FM e lua alaleo faasalalau i le FM, o le Base FM, ma le Power FM.