E ui ina toaititi le aufaigaluega faifeau sa galulue mai i tausaga ua mavae, peitai e faafetaia le Atua ona ua mafai ona tali mai e ala i le faasoasoaina o auauna e pei ona iai le taimi nei.
E valu aulotu a le Ekalesia Aso Fitu Tutoatasi i le matagaluega a Kuiniselani e aofia ai ma Cairns.
O le taimi nei e 2 Ekalesia o loo tausia e le Taitai, susuga ia Pr Lagolago ma le faletua ia Puataunofo Levae (Dara ma Bellbird Park) Ekalesia a Kingswood – Pr Togamau & Ianeta Tuiā; Ekalesia a Ipswich – Pr Malologa & Tāmara Fuesaina; Ekalesia a Inala – Pr Alesana & Ane Tuiletufuga.
O le Ekalesia a Southside ua valaauina nei i ai le susuga ia Luao ma le faletua ia Emo Matai‘a; o le Ekalesia a Annerly ua tofia i ai le susuga i le faafeagaiga ia Foa ma le faletua ia Mary Vaeluaga.
O le Ekalesia a Cairns o loo tausia e le susuga ia Pr Ioane ma le faletua ia Judith Maiava.
O faafeagaiga ua valaauina mo ekalesia fou sa galulue i nisi o Ekalesia i Niu Sila, ae viia le Atua ua maua lenei avanoa e galulue ai i Ausetalia, ma o se fiafiaga sili lea ma se faamāmā avega i le Taitai a Kuiniselani faapea nisi o faafeagaiga sa tailua Ekalesia na tausia, e pei ona pa‘e ai le saito ae toaitiiti le aufaigaluega.
O le susuga i le faafeagaiga ia Foa Vaeluaga e mai le alalafaga o Lalomanu, a o le susuga ia Luao Matai‘a e mai le alalafaga o Falelatai.
O le Aso Sa aso 5 o Fepuari na usuia ai le fonotaga tele a Ausetalia atoa i le aai o Niu Sa Uelese, lea na faatasi uma atu i ai faafeagaiga o Matagaluega taitasi a Ausetalia, na malaga mai ai foi le Taitai Aoao mai Niu Sila, le susuga ia Pr Uili Papu.
O le faaiuga o le masina o Ianuari na amata galulue ai i laua ma o la faletua ia la Ekalesia fou, ma o le afiafi o le Aso Gafua aso 6 o Fepuari na faia ai se taumafataga fiafia a le Matagaluega e talia fiafia ai ma faaulufale mai susuga i faafeagaiga ma o la aiga i le Matagaluega a Kuiniselani.
