E 50 avanoa faigaluega fou ia na faamautu mai i le vaiaso na te‘a nei e Funefeai Oliva Vaai le pule o le Yazaki EDS Samoa mo le fale faigaluega i Vaitele.
O se isi laasaga lea i le tulaga ua iai nei le toe faaauau ai o galuega o le gaosia o uaea taavale i le kamupani lea na matuā iloga ona aafia i le tausaga na tea nei ona o le faaletonu ai o le tamaoaiga o atunuu o le lalolagi.
O le Yazaki Samoa lava na aupito toatele ana tagata faigaluega na āfaina ma vaea ona o le suiga mai i fafo o le tamaoaiga.
Na matuā tuuitiitia ai le numera o ituaiga uaea moomia mo taavale gaosi ma aveese ai le silia o le ‘afa o le aufaigaluega i Samoa lava ia.
Mai i le latalata i le to‘a 3,000 na faigaluega ai i Vaitele o le tausaga lea na te‘a nei na matuā palasi lava oo i le to‘a 600 tagata faigaluega na totoe mai.
O le amataga la o lenei tausaga lea na toe vaaia ai loa ua valaau mai nisi sa galulue i le Ofisa mo le faaauau ai o le latou auaunaga. Sosoo ai ma le aufaigaluega e gaosia uaea ma talu mai le amataga o le tausaga e to‘a 300 na faaopoopo ma ua toe oo atu ai i le to‘a 900 le aufaigaluega i le taimi nei.
O le to‘a 50 fou la ia ua valaauina ua ave ai lava le faamuamua a le Kamupani ia i latou na vaea i le tausaga na tea nei ona o le lē tau a‘oa‘oina i le gaosia o uaea taavale.
Ua faapea foi ona toatele nisi o loo galulue i le taimi nei ua maua galuega i Niu Sila i lalo o le quota ma isi avanoa o galuega faavaitaimi i fafo.
O lea foi la ua iai fuafuaga a le Kamupani o le a faaauau ona faaopoopo le numera o le au faigaluega.
Faaalia e Funefeai o le faaiuga o Aukuso e moomia ai foi se isi faaopoopoga pe tusa ma le to‘a 50 foi tagata faigaluega.
O Setema ua fuafua e faafaigaluega ai se isi to‘a 30 ma na ia faaalia e tatau ona oo atu ia Oketopa ua atoa lelei se isi to‘a 300 e faaopoopo i le 900 o le numera o loo iai nei.
“O le maketi lava i Ausetalia lea o loo vaavaai i ai ma o le suiga e pei ona vaaia nei i le toe faafaigaluega ai o tagata gaosi uaea, ona ua amata foi ona vaaia le tele o taavale ua manaomia ma ua moomia ai le vave ona faatino o le gaosiga o uaea o ituaiga taavale ia e moomia mai e Ausetalia,” o se faaalia lea a Funefeai Oliva Vaai.
Na ia ta‘ua foi o loo iai nisi feutagaiga ma le Toyota a Ausetalia ma o se fesootaiga atonu o le a maua ai se isi faaopoopoga i galuega faatino atu i Samoa nei ma saga faaopoopo ai lava le numera o tagata faigaluega e toe aumai e le Yazaki Samoa.
O le tatalo a le alii Pule ina ia faaauau ona siisii pea i luga le tamaoaiga o le lalolagi ma ia tumau ai foi le manaoga o le Yazaki i le lalolagi e tumau le faatinoga o a latou galuega i Samoa nei ma na ia faaalia o le faatinoga lava o le galuega ia lelei atoatoa o le a faigata ai lava ona o ese le Yazaki ma Samoa nei.
