O se miti ua leva tausaga o moomoo i ai le Malo poo afea e faatu ai se pisinisi tele e tapena lelei ai le aano o le i‘a o le tuna poo atu, ‘asi‘asi, ma apakoa ma faatau i fafo.
O se i‘a o loo avea ma maoi o tagata o le lalolagi e fia taumamafa i ai, pe a gasese i soo se faiga.
E lē gata o se matai‘ai a tagata ae e aupito sili ona valelea i ai tagata Iapani i lona aano ona o le latou taumafa o le sashimi lele ua fiafia foi i ai lo tatou atunuu sa tele ina fiafia i le taumafa o le oka e ave i ai le peepee poo le loiloi i le suasami poo sina vai ua faamasima ae faafeiloi ma le sua o le tipolo, ma tipi i ai ma sina aniani e saga faalelei atili ai i le tausami.
O le kamupani o le Yuh Yow mai Taiwan o se isi vaega o le atunuu o Saina, ua latou faatu muamua i Samoa lenei tautua i se tulaga tele le aofaiga e ala i le mamafa o tuna e mafai ona latou faatau i fafo. O le kamupani lenei e iai ona lava vaa fagota tetele poo Longliners o loo fagogota solo i atunuu o le Pasefika ma Samoa.
E tuta mai o latou vaa i le uafu i Apia, ona la‘u ane lea i le nofoaga ua iai nei le kamupani o le Deep Sea Fishing ma tapena lelei ai ma tuu‘aisa ona sauni ai lea mo le ave i vaalele i atunuu e pei o Iapani ma Amerika.
Fai mai le alii pule faatonu o Chen Chao Ting i se talanoaga ina ua tatala aloaia le kamupani, ua matuā maofa lava lona tuaa poo lona tamā o loo taitaifono i le kamupani, i le 600 tane o le i‘a ua mafai e le kamupani i Samoa ona faatau i fafo talu mai Fepuari o le tausaga nei.
O le fagotaina o ogasami o Samoa e vaa fagota o le kamupani ua mae‘a ona ave i ai laisene, ma ua tautino le alii pule faatonu o le a faia e tusa ma tulafono faavaomalo ma aiaiga o maliega faavaomalo.
E na o le lima pasene lava o tuna e pei o ‘asi‘asi ma apakoa e maua i ogasami o Samoa o le a fagotaina, peitai o loo fagogota foi o latou vaa i ogasami i atunuu e pei o Tokelau, Niue ma le Atu Kuki.
“E leai la se mea e faapopoleina ai le atinae o faiga faiva i Samoa ma pisinisi tau faiga faiva”, o le faamatalaga lea a le alii pule faatonu i se talanoaga i le gagana peretania.
O le molimau foi lea a le taitai o le Malo le afioga i le Palemia susuga Tuilaepa Lupesoliai Sailele Malielegaoi, i lana saunoaga na tatala ai le pisinisi. O le tolu tausaga ua mavae sa soalaupule ai nei vaega uma, ina ia mautinoa ia ausia tulaga manaomia e le kamupani i ana tupe maua faapea foi ona faamalieina aiaiga o feagaiga ma tulafono faavaomalo e faasino i faiga faiva i le fagotaina o le tuna.
O loo fai paaga le kamupani mai Taiwan ma le Betham Brothers i Samoa i le faagaioia o le kamupani ma ua maua ai ma avanoa faigaluega faaopoopo mo o tatou tagata.
O loo sailia nei e le kamupani ni tagata e lelei ma talenia i le galuega o le faifaiva e faaauvaaina o latou vaa fagota, ma o se tupe lelei ua ofo mai mo nisi e fia maua ia galuega, atoa ai ma isi faamanuiaga.
