O le alu o se tama tane i se fale o se aiga i le po ona o le fia faatino o sona tuinanau ua ta‘ua lea i le faasamoa o se aga a se moetolo.
O le faamatalaga lea a le faamasinoga ina ua mae‘a ona silasila i mau a leoleo e lagolago ai le solitulafono o le faaoolima matagā sa molia ai le alii o Tuna Sio. Ua valu nei tausaga o le teineitiiti na aafia i le moetolo a le alii o Tuna, ae sa 6 ona tausaga i le taimi na tupu ai le solitulafono.
O lē ua molia sa 20 tausaga i le taimi lea, ae o le taimi nei ua 23 tausaga o lona matua. E iai le sootaga faaaleaiga o lē ua molia i le tamaitai na aafia.
I le uluai fofogaina o le moliaga na tetee malosi lē ua tuuaia peitai ina ua faatulaga e le faamasinoga le aso e valaau ai molimau a leoleo, ae toe sui le mafaufau o lē ua molia ma ia ioeina loa le moliaga o le faaoolima matagā.
E fitu tausaga i le falepuipui le faasalaga maualuga o lea solitulafono pe a faamaonia, ae sa teuteuina e le Palemene le faasalaga ma sii ai le faasalaga maualuga i le 14 tausaga i le falepuipui. O le silasila a le faamasinoga o le faailoga vaaia lea o le matuia ma le ogaoga tele o lea solitulafono ona ua taatele i le atunuu.
O se faasalaga foi ua faaopoopo tausaga i le falepuipui ina ia ta‘u atu ai ia i latou e faia ma fuafua e latou te faia, e matuia tele ma e tatau ona puipuia le saogalemu o fanau ma le atunuu mai le aafia ai.
O tolaulauga a leoleo na faaalia ai o le aso 21 o Me o le tausaga e 2009 a o faasuavā lē ua molia, sa ia ulufale ai i le po i le fale o le teineitiiti na aafia, ma faatino i ai nei amioga sili ona matagā.
Sa faamatala uma e le teineititi nei gaioiga matagā i le lipoti ua ta‘ua o le victim’s impact report, ma o se tulaga ua maasiasi lē na aafia aemaise pe a iloa e nisi le mea na tupu ia te ia.
Faaalia e leoleo e lei iai se leo pe ee le teineitiiti i le taimi lea ona o lona fefe, ae o le aso na sosoo ai na ta‘u ai e le teineititi i se tasi o lona aiga (aunt) le mea na tupu.
Na logo e le tagata lea o le aiga le tala i le tina o le teineitiiti ma taunuu ai loa le mataupu i leoleo.
Na faailoa e le loia a lē ua molia i le faamasinoga sa tele se avamalosi sa inumia e lē ua molia, i le po na ia faia ai le solitulafono. Sa faasala e le nuu lē ua molia lea sa ia totogi ai se sala tupe e tasi le afe tala ma pusa‘apa e 30. Sa faatoese foi i le tina o le teineitiiti.
O tautinoga tusitusia mai le faifeau ma le pulenuu sa tuuina atu i le faamasinoga o loo faaalia ai o Tuna o se tagata lelei a o lei tupu le solitulafono ma faato‘ā molia foi lea i se solitulafono. O le molimau foi a lana loia ua oo ifo le salamō moni i lē ua molia.
I le vaai a le faamasinoga e iai vaega lelei mo lē ua molia ma amata ai lana faasalaga i le 2 tausaga, ae sa toesea le 2 masina ona o le ioeina e Tuna o le moliaga, toe aveese le 10 masina ona o lona salamō ma lana amiolelei a o lei aafia i se moliaga faasolitulafono.
Na toe toese e le faamasinoga le isi 4 masina ona o lana sala na fai i le nuu totoe ai le 8 masina ua faasala ai i le falepuipui.
