Ua maua nei ma taofia i le vaaiga a leoleo le alii lea sa tau sailia i ni ana soligatulafono sa ia osofaia ai fale o nai tagata matutua, aemaise lava i tina matutua. Peitai o loo lapataia pea e leoleo tamā ma tina matutua, ina ia nofouta pea ma faaeteete i le soona tatala o faitotoa ma talia e ulufale atu i o latou fale, ni tagata e o atu i ni mafuaaga eseese.
O le alii 36 tausaga lea sa tau saili, o William John Murphy, 36, na maua i le aso ananafi ina ua lavea se taavale gaoi sa fesolasolatai ai lenei alii, a o fai tuliga ma leoleo ina ua iloa e leoleo i le State Highway 1 i le itu i matu o le Puhoi toll tunnels, i le tusa o le 8 i le taeao ananafi.
E lei umi ona tuli e leoleo ae lavea loa le taavale na alu ai lenei alii, tia‘i loa le taavale ae faaauau lana solaaga agai atu i le togavao e latalata i le Puhoi River, e pei ona ta‘ua e leoleo.
Na agai atu le vaega a leoleo faatasi ma taifau, faapea foi le helikopa a leoleo ma e lei umi ae maua taitaia ai le alii o Murphy. Faapea se faamatalaga, e lei tele se faafaigata o lenei alii, ae na siilima vave ane lava i leoleo. O se taimi lava o le aso ananafi na faatulaga e tulai ai Murphy i le Faamasinoga Faaitumalo i North Shore.
E tusa ma le 7 ni osofaiga sa faia e lenei alii i nai tagata matutua, mai le va o le 69 i le 97 tausaga o nei tagata matutua, lea na amata mai ai lava ona sailia e leoleo lenei alii. Ae o le mea mulimuli lava lea na toe osofaia ai e lenei alii i le Aso Toonai talu ai nei, le fale o se tina 74 tausaga o lona soifua, i Pakuranga.
Faapea na tu‘itu‘i lenei alii i le fale o si tina matua ma faapea atu i ai, o loo faasolo atu lana fesoasoani i o latou fale ona o loo tele ni tagata leaga i lea vaipanoa, ma o loo ia ofoina ni fesoasoani mo le saogalemu o tagata. Mulimuli ane na tofu lenei alii i totonu o le fale o si loomatua, ma faaoolima loa i ai, saisai ona lima ma tia‘i ai i lona fale, ae sola Murphy ma tupe, o bank cards, ma nisi meatotino tāua.
E faafetaia ona na vave ona maua se laveaiga o si nei tina ma avatu ai i le falemai e ui e lei maua mai se isi lipoti lata mai i le tulaga o loo iai nei le tina.
O loo galulue malosi pea leoleo i Aukilani, Counties Manukau ma Waitemata i le faagasologa o latou suesuega i nei solitulagono matuia ua aliali tele mai lenei taimi.
O isi tagata matutua na osofaia foi, e i Remuera, Orewa, Takapuna, Northcote, Herne Bay ma Westmere. O loo malosi pea le lapataiga a leoleo, ona e lei mautinoa mai lenei taimi, pe faamata o iai pea nisi tagata leaga faapei o Murphy, o loo feoai foi ma faatino nei soligatulafono.
O loo lapataia e leoleo le tāua o le galulue faatasi ma le fetausiai o tuaoi, ina ia vave ona matauina ni osofaiga faapea e faia nei tagata leaga i nisi o tatou tuaoi, aemaise lava nai mātua ua matutua.
