Faamuta tofiga Komesina pulega o le Tineimu

“O le taunuuga o suesuega faasaga i le komesina, ua faavae ai le iuga a le Kapeneta”… Letaa Daniel Devoe
O le vavaeeseina o le auaunaga tau tineinu mai le Matagaluega o Leoleo ma Falepuipui, na faatūina ai e le Malo le pulega e faasino i lea tautua aogā ma tāua mo le atunuu atoa, ma faaopoopo i ai ma galuega fesoasoani mo faalavelave faafuasei e pei ona faaigoaina o le Samoa Fire and Rescue Authority.
O le faatūina o lea pulega fou e le Malo na filifilia ai le afioga Seve Tony Hills e avea ma Komesina poo le faauluuluga i se aiaiga faakonekarate e tolu tausaga.
Ua mae‘a lea taimi faatapulaa ma toe faaopoopo ai e le Malo le 4 masina e avea ai lea tamalii ma komesina peitai ua faamuta pe terminate lana konekarate.
Ua faamaonia mai e le taitaifono o le Komiti faafoe o le pulega o le tineimu ma galuega fesoasoani mo faalavelave faafuasei, le afioga Letaa Daniel Devoe le tuuina atu o le FK, poo le pepa o faaiuga a le Kapeneta i le Aso Lulu na tea nei, ua logoina ai le komiti faafoe i le faaiuga a le Kapeneta.
Faaalia e le taitaifono o le taunuuga o suesuega a le Komesina o Sulufaiga poo le Ombudsman i ni tuua‘iga faasaga i le Komesina o le tineimu ua faamaonia ai ni ona aafiaga i le pulea o meatotino a lea matagaluega a le Malo.
E lei mafai e le taitaifono ona faailoa mai poo ā tuua‘iga, ae sa ia faailoa mai i le tusitala o loo tauaaoina nei e le matagaluega o leoleo ni moliaga tau solitulafono ua faia faasaga i le afioga Seve.
O nisi molimau na mafai ona maua ua ta‘ua ai o ni faaseā a ni tamaitai se toalua o loo galulue i le tineimu na ave i le Faalapotopotoga o le Toomaga mo ē Puapuagatia le Samoa Victim Support Group, na faaoo atu i leoleo ma faia ai loa suesuega seia oo ina molia ai loa ma lea tamalii.
E lē o mafai ona faailoaina mai e le taitaifono o le Komiti faafoe o lea auaunaga a le Malo, poo ā gaioiga sa faia e Seve i ia tamaitai o le ofisa, ae ua ia faailoa mai o le Toomaga mo ē Puapuagatia na latou tagofia faaseā a ia tamaitai.
Ua faasalalau nei le avanoa mo se isi Komesina fou o le tineimu ma galuega fesoasoani i taimi o faalavelave faafuasei ma ua faaalia e Letaa e tapunia talosaga i le faaiuga o le masina nei, ona iloa ai lea o se tasi o le a tauaveina lea tofiga maualuga.
I le suesuega a le Komesina o Sulufaiga o loo ta‘ua ai e se molimau, o nisi o tuua‘iga faasaga i le afioga Seve, o le faaaogā o lona tulaga i ni auala faaalatua na ia maua ai ni faamanuiaga tau tupe e faasino i se tasi o ana kamupani poo se pisinisi.
E lei manuia sailiga mo le fia maua o lea lipoti ae ua faaalia e le taitaifono o le Komiti faafoe le afioga Letaa Daniel Devoe, ua ia maua faamatalaga i ia tuua‘iga ma le faaiuga a le Komesina o Sulufaiga na ave i le Kapeneta, ae e lei oo atu ia te ia ma le Komiti se kopi o lea lipoti.