O le vaiaso ua tuanai atu na faailoa ai i totonu o le Palemene a Ausetalia le Tala faatatau o le Tupe (2013-2014 Budget). O se felafolafoaiga na tulimatai e le atunuu aemaise foi na i o tatou tagata o aumau ma soifua i Ausetalia nei.
O le tulaga ogaoga na talanoaina o le motusia lea o le ponesi e $AUD5000 mo pepe e fananau mai. O lenei suiga o le a amatalia i le aso muamua o Mati i le tausaga fou (1/3/2014).
O lenei faaaliga mai le malo ua totoe ai nei o le sefulu masina o lea tului tāua i soifua o mātua ma tina ua faamanuiaina nei e ala i ma‘itaga.
Na saunoa foi le Teutupe a le faigamalo ia Wayne Swann, o le fuafuaga mamao mo le isi sefulu tausaga, ia teuteu ma faaleleia atili le tamaoaiga i lenei vaitau o le maualuga o le Tupe Ausetalia. O le maitau a le aupopoto i le faitauina o le Tupe faaalu ma le tupe sau a le malo ua mautino ai itu lelei.
Faaopoopoga Lelei
O le faaopoopoina o le $3.3 piliona mo i latou e iai manaoga faapitoa poo le Disability Care ma le Medicare lea e tusa ma le $1.3 piliona lona aofai i le silia ma le fitu tausaga. O lona uiga o le a maua ai se faamanuiaga fou e $14.3 pilona tala.
E $9.8 piliona le tupe aofai ua fuafua nei e faaalu i Aoga na talanoaina ma pasi i le Gonski Review lea e amata i le tausaga 2014/15.
E $113 piliona tala ua atofa mo le puipuiga ma le vaega‘au (military) e tusa ma le $10 piliona faaopoopo i totonu o le sefulu tausaga auā le fausia o vaaleletau faaneionapo o le ituaiga o le 12-EA-18A Growler.
E $24 piliona tala ua pasia mo le faaleleia o le ala mo nofoaafi (rail) i Melepone, auala tuusao (motorway) i Sini nei ma Perisipeni.
Ua pasia foi le $300 miliona mo aoga amata ma fale tausi tamaiti (childcare)lea o le a tatala i le po mo matua galulue i sifi po.
Mo i latou o tau saili galuega (newstart) e $300 miliona o le a faaopoopo e tului ai le ta‘i $100 i le lua vaiaso mai le $60 i le lua vaiaso o iai nei.
E $434 miliona o le tuuina atu mo galuega mo puipuiga o fanau mai sauaga matagā (Child Abuse). I totonu o le 5 tausaga e $2.2 piliona o le faasafua i le pili mo fomai poo le Medicare ae peitai e $226 miliona tala ua faaagaga mo le tausia ma le sailia o se fofo o le kanesa (Cancer)
I se fesoasoani mo tagata matutua e $1121.24 miliona o le a fesoasoani mo le sailia o fale ma maota mo tagata matutua e aunoa ma le aafia o a latou penisione (senior citizens) ma le $9.9 miliona e faaola ma faaleleia ia latou upega tafailagi o le broadband.
E $100 miliona o le a fesoasoani i inisiua auā le foia o le faletonu o inisiua i lologa e pei ona aafia ai Perisipeni. E $100 miliona se alauni mo faifaatoaga i taimi faigata o lologa, mugala ma afā. O le puipuiga a Ausetalia i soligatulafono ma kegi (anti-gangs) ua tuu i ai le $64 miliona faapea le tai $40.9 miliona i Setete taitasi faapea le $42 miliona mo sailiga faasaienitisi i suiga o le tau o loo faagasolo i le Pole i Saute lea e iai aafiaga o le magoto ai o atumotu o le Pasefika.
