O se tasi lenei o tala faanoanoa i le tele o nisi e malaga atu i Samoa ma maliliu mai ai, e fenumiai faatai o palolo ai mafaufauga ma fetautaua‘i faa‘auvaa lelea ai lagona o nai aiga o loo tu‘i atu le mulipapaga, pe a faateia i tala faamomoiloto i le momotu faafuasei o mafutaga a o feagai ma faigamalaga i isi atunuu aemaise Samoa.
O le taeao o le Aso Toonai 13 o Oketopa na taunuu mai ai i Brisbane nei le tino maliu o le susuga ia Polo Taumaiasi (Apolima). O se tasi o alii sa lauiloa foi i le faaili logo mālie a le UPEC BOYS, lea e masani ona faafiafia i le sailiga o se tausala i Ausetalia poo le Miss Samoa Ausetalia.
Na maliu o ia a o iai i faigamalaga i Samoa i nisi o fuafuaga a le Ekalesia, faanatinati atu i le falemai ua fai lava sina tuai. O lenei lava faafitauli e ao ona silafia ma manatua le fesoasoani muamua e laveai ai se tasi e aafia faafuasei i gasegase, atonu ana iai se tasi e agavaa i lea tulaga ma to‘a, semanū atonu lava e faasaoina lona soifua. Ua misia foi e le toatele o le au eva i le musika lea alo o Samoa i lana taleni e pei ona tautua ma lauiloa ai i le faaili a le UPEC Boys.
Na logo i tulu‘iga o lagona tiga se tala faamomoiloto sa tuia ai le faletua ma le nofoaalo aemaise o aiga pele. Sa faia ona sauniga faaleaiga i le afiafi o le Aso Sa, 14 o Oketopa i le malumalu o le ekalesia Katoliko a Marsden.
O toe sauniga o le susuga ia Polo Taumaiasi sa faia lea i le Aso Lua, 16 o Oketopa i le Ekelesia Katoliko ma lagomau ai i lona oliolisaga tumau. Faamaise le agaga o le Atua i aiga tagi mai ala faapea le aiga loto nutimomoia!
