Auā sa e tau le taua i le suesueina ma le tauiviina o le mafaufau faalea‘oa‘oga, ua a‘e malo foi le tauasaina ma le sailiiliina o le poto ma le tomai ina ua tau lau o lou faamoemoe, ma ua e aeae ai nei i maaomālie ina ua tali faaaliali le Atua e tusa ma le faaiuina ma le faataunuuina manuia o lau moemitiga o lenei tausaga.
Alatina Va‘a malo le onosai, malo le tauivi, malo le faamalosi, faafetai foi le talimanao. O Alatina Va‘a ua faamanuiaina ma faauuina mai i le Iunivesite i Aukilani i lona tusipasi o le Bachelor of Art. Ave laia o le viiga ma le faaneetaga i le Atua auā o lea ua e maua ana faamanuiaga e ala i lenei meaalofa tāua ua e taulimaina. Ia alofagia foi e le Atua lou faamoemoe mo se galuega e tusa ma le tomai ma le agavaa ua e maua ina ia faaauau ai pea le faataunuuina o lau taleni mo le lumanai.
Avea foi lenei laasaga ua e maua e fai ma luitau i le tele o tupulaga ma a latou filifiliga fai mo le lumanai.
Faamanuiaga ma Alofaaga mo oe mai ou mātua peleina o Okesene Va‘a mai Vaiee ma Saanapu, Felila Va‘a mai Lalomanu ma Safaatoa Lefaga, aemaise ai o ou aiga uma lava i soo se vaega o lenei kelope, ina ua e ausia lenei laasaga lelei mo lou lumanai.
