(Faigapaaga ma le Metro South Hospital and Health Service Queensland)
Ma o le fu‘a taualuga lea o lenei matimati na filimafua i ai le tofa alualu mamao a le Leo o Tagata Samoa i lana Komiti mo le Soifua Maloloina, faatasi ma paaga e pei o le Metro South Hospital ma le Health Service i Kuiniselani, ma le anoano o le lagalagosua a nisi o auaunaga eseese (services) i totonu lava o le vaiaai nei o Kuiniselani.
O le ta o le itula e 10.00am i le taeao o le Aso Sa, 23 Setema 2012, na tatala aloaia ai le polokalame ua faaigoaina o le “Soifua Maloloina” Healthy Living for the Samoan Community and Community at Large ma faatinoina ai lenei manulauti faataoto (project/initiative) e pei ona faavaeina e le Leo o Tagata Samoa Incorporated i Logan Kuiniselani Ausetalia.
Ma na faataunuuina lenei faamoemoe tāua i le nofoaga autū o le “Logan Brothers Rugby League” i Logan Central lava.
Na muai fofogaina le faamaninoga o le faaaogāina o le nofoaga ma nisi vaega tāua mo lea Aso na saunoa i ai le Peresetene o le Rugby League Samoa Queensland, le Susuga ia Matthew Tuisamoa.
Ona tuuina aloaia mai lea o le avanoa i le Sooupu o le Faalapotopotoga a le Leo o Tagata Samoa i Logan (Voice of Samoan People Incorporated) – Le‘autuli‘ilagi Malaeoalii Sogialofa Vaa Leapai e fofogaina le faafeiloaiga aloaia auā malo faaaloalogia ma faalauiloa foi le lagolago a auaunaga eseese (sponsors) na afua ai ona mafai ona faatinoina lea Aso.
O le tatalo puupuu na fofogaina foi e le Sooupu e tatala aloaia ai le faamoemoe o lea Aso, auā e talitonu o le mafuta mai o le Agaga Faauu o le Atua e uli ai ma sao lenei faamoemoe.
Na saunoa faapitoa le Afioga ia Lemalufaitoaga Felise Tautalasoo, “O le Taitaifono a le Komiti mo le Soifua Maloloina ma o le Teutupe foi a le Leo o Tagata Samoa Inc i Logan e faailo nisi o vaega tāua ma le latou pitolaau faakomiti o le Soifua Maloloina ina ia manino le loaloa o tagata eseese o le Pasefika i lea Aso ma lona aano tonu.
Na mafai ona auai le Afioga i le Tamaitai Faipule o le Vaega Faaupufai a le Leipa poo le Malo Faasetete o Kuniselani i le aai, o Woodridge/Logan Central le Afioga ia Hon Desley Scott o se tasi o malo faaaloalogia o lea Aso ma na maua foi le avanoa e saunoa ai ma ia faamamafaina lava le manulauti o le Aso ma lana faafetai i le tuufaatasiga o lenei milamila anoa mo le soifua maloloina o nai o tatou tagata.
Na mae‘a lea ona alo loa lea i faafiafiaga eseese e faamamafaina ai lava le tulaga i le taumafa i meaai paleni ma le soifua maloloina, aemaise o taaloga ma isi faatinoga faamalositino e faatāuaina ai pea le soifua maloloina o nai o tatou tagata. Ae lē gata i lea o taumafa eseese i lea Aso e faailoina ai pea le tāua o taumafa paleni.
Na mafai ona auai faatasi uma le toatele o sui o le Faalapotopotoga a le Leo o Tagata Samoa Incorporated i Logan e lagolagoina le faamoemoe o le Komiti o le Soifua Maloloina.
Na auai le Afioga i le Peresetene o le Leo o Tagata Samoa le Tofa ia Faimalotoa Ioane Pale ma le Laulau a Fono (Executive Committee) ma nisi o le au matutua a le Leo o Samoa e tapuaia le alofaiva o le Komiti i lea Aso.
O le komiti o le Soifua Maloloina na nafa ma le faatautaiga o lenei faamoemoe tele – Afioga Lemalu Felise Tautalasoo (Taitai Komiti), Randy Stanley, Lote Savelio ma le sui mai le Autalavou ia Allan Alofipo.
Na mafai foi ona iai le lagolago a le Fundraising Committee a le Leo o Tagata Samoa i lea aso, le Afioga ia Salā Kelemete Tito, Misa Loto Faafei‘i ia ma le lagolagosua a le Sooupu a le Leo o Tagata Samoa Le‘autuli‘ilagi Leapai.
