O le faaiuga o le vaiaso na tea nei na maua ai e se ulugalii se pepe o moe i totonu o le taavale na o ia. Na manatu le ulugalii e lē o se mea saogalemu le pepe lenei e taatia mai i lona moega na o ia i totonu o le taavale i se pitonuu i Porirua i le taulaga ma faleoloa.
Na faalatalata atu i ai le ulugalii ma iloa ai le pepa o loo tusi ai le faaupuga lenei, “O lo‘u tina o loo fai le faatau ae a manaomia ona telefoni mai lea.” Sa tusia ai ma le telefoni a le tina i lalo ifo o le feau lea ua tusia.
Na vili loa e le ulugalii le tina lea ma logo i ai le tulaga lē saogalemu o le tuu o le pepe na o ia i le taavale. Ua sau le tina ma ia iloa le leaga o lana mea ua fai ae na ia faanatinati i le faleoloa mo se faatau tāua mo laua ma si ana tama.
Tuu laia aua le toe faia lea mea valea ma le lē saogalemu i le oloa tāua a le Atua. Pe tasi le minute pe fia, e lē iloa lava le faalavelave e tupu faafuasei.
