O le tofa ia Lagaaia Lagi Mann i le ogatotonu, faapea lana aufaigaluega le tamaitai ia Ula itu agavale ma Perise

O le tofa ia Lagaaia Lagi Mann i le ogatotonu, faapea lana aufaigaluega le tamaitai ia Ula itu agavale ma Perise

Ua lausilafia le tautua a le Langi’s Island Styles aemaise totonu o Ueligitone, peitai, o le mae’a ai o le 30 tausaga o lana tautua, ua a’e ai se tofa i le pulega o le a faamuta lana tautua i le faaiuga o le masina lenei o Iuni.

O le Langi’s Island Styles o se pisinisi faleoloa sa faapitoa lana tautua i le faatauina atu o laei o alii ma tamaitai, e le gata i lea, o tusi i le gagana Samoa, o meataulima faapea CD pese ma Ata tifaga i le gagana Samoa. Na faavaeina lenei tautua e le tofa ia Lagaaia Lagi ma lona alii le Susuga ia Geoff Mann.

“O le tolusefulu o tausaga e le o se taimi puupuu, ma ua sau foi le matua ua le toe tutusa foi le malosi, ua tonu ai i le manatu ua oo foi i le taimi e malolo ai.”

O le saunoaga lea a le tamaitai pule, le tofa ia Lagaaia Lagi Mann.

O le a misia e Samoa uma i totonu o le laumua le tautua a Lagaaia ma lana aufaigaluega le tamaitai ia Ula ma Perise, o taimi o le Lotu o Tamaiti, o le Aso Sa o Tina ma Aso Sa o Tama, e agai ai le toatele o loo aumau i Ueligitone i le Langi’s Island Styles aua ni laei mo nei aso faapitoa, e le gata i lea o puletasi ma alo’a o alii pe a sauni mo ni faamoemoe taua.

E le faigofie ia Lagaaia ma Geoff faapea le aufaigaluega ona faamavae mai ia Samoa, peitai, e talitonu Lagaaia, o le taimi talafeagai lenei e faamuta ai le tautua ae fai se malologa. “Ua leva lava ona manao e faamuta le tautua, peitai, sa ou faatalitali pea ona o lo’u manao ia soo le fau ma le fau, ina ia malolo atu matou, ae faaauau e nisi foi Samoa le pisinisi, aua lava le tautuaina o le atunuu.” O le saunoaga lea a le tofa ia Lagaaia, na ia faaalia foi lona fiafia tele, aua o i latou o le a faaauauina le pisinisi, o ni tamalii Samoa foi, lea ua fuafua e amata aloaia le latou tautua i le faaiuga o le masina nei. E le tuuguguina le matou galuega e ao ina momoli atu la matou faafetai ia Samoa ona o le lagolagoina o lenei pisinisi i le tele o tausaga.

FAAFETAI FAAFETAI SAMOA

E faapōpō a’o ni aso ua, a’o aso folau foi ua lē tuua. O le aso ma le filiga, o le aso foi ma le mata’igatila. Ae o le Atua ma lana Kalena, e goto le la ma toe oso a’e i le aso fou, ae o lona alofa e lē liliu, ae faavavau.

O le a lē toe afua siisii se leo o le auauna, i le paia ma le mamalu o si o tatou atunuu, aemaise uo ma paaga masani a le Langi’s Island Styles i Aotearoa nei.

O Lagaaia Lagi Mann ma le aufaigaluega o le Langi’s Island Styles e momoli atu le faafetai tele mo le lagolagoina o lenei auaunaga ua ova ma le 30 tausaga.

Ua oo mai le taimi ua tatau ona litaea. Ua matua foi le soifua. Mo le taimi nei o le a faaauau pea le auaunaga e nisi o alo Samoa.

Afai foi sa lapelapea le auaunaga ia mālū ave i fale io outou finagalo.

Ia alofa le Atua faafua loa lo outou soifua ae ola le auauna.

Faafetai tele Samoa

Lagaaia Lagi Mann faapea le Aufaigaluega

Langi’s Island Styles.