Ua faalauiloa mai nei le faamavae o le tamaitai faipule, o ia foi sa avea ma se tasi o minisita a le faiga malo a le Leipa i lona tulai mai, le Afioga Luamanuvao Winnie Laban.
Na iloga le tulai mai o Winnie i le tofi minisita o mataupu tau tagata Pasefika, aemaise i le tele o mea sa ia finauina auā lava se lelei ma se manuia o tagata Pasefika o loo aumau i Niu Sila nei.
Ae o le Aso Lua talu ai, na faalauiloa mai ai luga o alaleo ma upega o fesootaiga lenei tala e faateia ai le toatele o i latou ua iloa lelei ma silafia lenei tina finafinau ma le agaga fia fesoasoani mo ona uso a Pasefika.
E lē mafai foi ona galo i le talafaasolopito o tagata Samoa o loo aumau i Niu Sila nei lenei tamaitai saili malo, auā o ia lea na muai faaeaea ai foi le igoa o Samoa, o se uluai tamaitai Samoa ma o se uluai faipule tamaitai foi o le Pasefika ua ofi i totonu o faalagamaea o upufai a le Malo o Niu Sila, aemaise o se uluai tamaitai faipule Pasefika ua umia se tofiga minisita.
E tele lagona eseese na faaleo ina ua salalau le tala ua faamavae Luamanuvao mai le Palemene ma upufai o malo.
O nisi lagona le fiafia ma lo latou matuā lagolago i le filifiliga ua faia e le tamaitai faipule, i luga o o latou manatu, e oo uma lava i tagata soifua le lagona, e fia faia foi se suiga mai se isi mea lelei, i se isi mea lelei.
Peitai e iai nisi e lagona peiseai ua faanoanoa, ona o le faamavae ese o le tamaitai faipule sa tele ina finauina se leo o tagata Pasefika i totonu o le Palemene aemaise lava a o iai lea matagaluega i lalo o lana vaavaaiga, ua latou lagona ai, e pei o le a mou atu so latou faamoemoe, e ui lava e lē o toe nofoia e Luamanuvao le nofoa lea i le taimi nei. Lona uiga o loo iai pea i nei tagata le faamoemoe, afai ae toe pale le faiga malo a le Leipa i se taimi i le lumanai, e latou te toe fia vaaia foi Luamanuvao i le tofiga lava mo mataupu tau le Pasefika.
O le faamavaega a Luamanuvao, ua moni ai le upu, ‘E tuu nisi mea lelei, ona o nisi foi mea lelei.’ Ua faasilasila mai e Luamanuvao, o lona faamavae ese mai le ma tapuni atu le faitotoa o le soifuaga faapolokiki, ua ia nofo sauna ai e tatala mai le isi faitotoa tele, o lona tofiga o le a sauni atu i ai, e avea ma Assistant Vice Chancellor Pasifika i le iunivesite a Vitoria. Na ta‘ua e le taitai o le vaega faaupufai a le Labour, Phil Goff le faanoanoa ona o le a telē se misia o Winnie i totonu o le latou faafaletui. Saunoa Goff, “E telē ma mataina se sao sa fai e Winnie mo le Pasefika, ma o se avanoa lelei foi lenei o le a faaauau ai pea ona galue e unaia ma faamalosia atili mea lelei mo tagata o le Pasefika.”
E ui lava ina ese le vaega o le a galue ai nei Winnie, ae o le a tumau pea ona avea ma lagolago malosi mo le Vaega a le Labour.
Na saunoa foi le tamaitai faipule, ua ia tulimataia le avanoa fou o le a galue ai i le vaega tau aoaoga, ae o loo ia tulituliloa ai pea lona faanaunauga, ina ia fesoasoani atu i alo ma fanau a le Pasefika i le itu tau a‘oa‘oga.
Sa ia faaleo foi lona matuā talisapaia o nofoaiga e tolu a le Palemene lea sa ia nofoia mai ai pea le nofoa o le itumalo o Mana, ae ua ia lagona ua oo mai le taimi ua tatau ona ia see atu i se isi foi laasaga fou o le soifua galue.
I se isi a tatou lomiga o lumanai, o le a toe avatu ai se isi faaopoopoga atili o se tusitusiga e faatatau i le filifiliga a le tamaitai faipule e faamavae mai le Palemene i lenei taimi.
