E lē falala fua se niu, e mafua ona ua agi le matagi.
O le loto e faia ai le filifiliga tonu a soo se tasi, ma e masalo o le iuga lava lea o mea uma pe afai ua mautu ma taualuga mafaufauga o manatu ma lagona o se tagata.
O le faamavaega a le tamaitai tausala Ausetalia 2010 o Sallie Peterson 21 ona tausaga, e faateia ai le faafofogaaga a nisi o le mamalu o le atunuu i nisi o tafa o le lalolagi, peitai e tāua tele se mafuaaga ua folasia ai i lumamea lea fuafuaga.
E pei ona silafia, o le sui lenei sa tauva mai i Brisbane i le tauvaga sa faia i Sini i le aso 30 o Iulai 2010, ma manumalo ai i le pale o le Miss Samoa Ausetalia 2010, e fai ma sui o Ausetalia i le tauvaga o le Miss Samoa lea na taualuga i ai le faamanatuina o le Teuila o lenei tausaga i Samoa, ma sa tulaga tolu ai (2nd runner up).
O le tauvaga lena e saili ai se tamaitai e toatasi e fai ma sui o Samoa aoao i le tauvaga o le tamaitai lalelei o le Pasefika (Miss South Pacific), e faia i se taimi mulimuli ane o lenei lava tausaga 2010.
E ui ina faigata i le tamaitai tausala ona ia faamamulu ese atu le pale o loo ia paleina, ae ua alagatatau i lona ia lava manatu mo lona lumanai ma le agai i luma o lona soifua.
E iai nisi sa tuufesili pe aisea na lē faamae‘a ai pea lona tausaga ona fai ai lea o lana filifiliga, auā o avanoa lē aumaua, ae e iai le talitonuga o le a lē avea lea ma pogai e toe suia ai lona mafaufau ma filifili ai loa e faamavae ma tuua le tofi.
Na tali uma nei fesili ina ua saunoa manino le tamaitai o Sallie Peterson i totonu o le potu faasalalau a le Penina o Asuisui 1197am i Kuiniselani, e pei ona faatalanoaina ai i ana fuafuaga ua mae‘a ona faataatitia.
Na logomalie saunoaga a sui o le komiti a le Miss Samoa Ausetalia, faletua ia Eseta Frost (failautusi) ma Muliagatele Filipina Petelo (sooupu) faatasi ai ma Sallie.
Na taliu mai le faigamalaga mai Samoa i le Teuila, ae faateia i le tali mai ua faamanuiaina le apalai a Sallie i se avanoa faigaluega e malaga atu ai i Dubai, o ia o se tamaitai fealuai vaalele poo le air hostess a le kamupani vaa o le Emirates.
O le tamaitai o Sallie Peterson, e iai lana miti e fia avea o ia ma tamaitai air hostess, lea la ua tali mai le Atua, ma e tatau lava ona faataunuu, auā ua ia talitonuina e moni lava ma taunuu miti.
Na malaga uma le Miss Samoa Ausetalia ma le latou komiti i le aai o Niu Sa Uelese, e logoina le tamaitai tauva o Rebecca Sutherton, (Miss EFKS CANTERBURY) o ia lea o loo tulai mai i le tulaga lua, i le Miss Samoa Ausetalia 2010.
O le isi tulaga na autasi ai e malaga aloaia, ona o le sponsor a Rebecca, o le susuga i le faafeagaiga ia Rev Iakopo Leleimalefaga ma le faletua, e alaala uma i Sydney.
Ua faamoemoe o le a faapaleina le tamaitai o Rebecca Sutherton o Bankstown NSW, i le Aso Faraile aso 05 Novema 2010 i Liverpool Catholic Club Function Room i Sini Niu Sa Uelese i le ‘afa o le 6 i le afiafi.
O Rebecca o le alo o Alieta Fouvale mai le afioaga o Auala Savaii ma Howard Sutherton mai Wales Great Britain.
O Sallie o le alo tamaitai o Selaginato Tina Wulf mai le afioaga o Auala Savaii ma le susuga ia Ian Peterson mai Egelani.
O nisi o alo tamaitai sa tauva i le sailiga o se Miss Samoa Ausetalia 2010, ua faamanuiaina foi mo avanoa i fafo atu o Ausetalia e iai le tamaitai o Danielle Lelosa, ua tuuvaa atu mo le Caribbean mo le Miss Intercontinental – o le tauvaga e piki mai ai tamaitai models o le lalolagi.
O le tamaitai o Faaselega Oloapu o St Andrews NSW, ua tuuvaa atu nei e tauva mo le Miss Earth International i Vietnam.
