Tele molimau i lona tausaafia i ana taleni ma ona uiga osi aiga
O lana mafutaga ma le atunuu i lana galuega faasalalau, o le pine faamau lea o le toatele o le atunuu mai lava i taitai o le Malo, e oo i faafeagaiga o soo se ekalesia, o tamalii ma failauga, faletua ma tausi ma sa‘oao, faapea tina ma fanau ma le tupulaga talavou, sa tumutumu ai le maota o Tupulaga o le EFKS i Mulinuu i lona sauniga faaleaiga (family service).
E 4 itula le umi o le sauniga ona o le toatele na fai a latou molimau, ma o le umi foi lea na faasalalau tuusa‘o ai e le faletelevise o le TV3 ma le leitio o le Talofa FM lona sauniga faaleaiga.
O molimau a aiga o Sumeo (tulou le paia o suafa o ona aiga), e leai se isi e lei talanoa i lona osi aiga. Poo fea o Samoa ma atunuu i fafo e fai ai se faalavelave, e lē nofoa‘i e alu i ai. Atonu o lona osi aiga foi lea ua masani ai i le toatele o faifeau e oo lava i afioga i Patele ma Fesoasoani o le ekalesia Katoliko.
Na molimau le susuga i le faifeau penisione malolo, le susuga Lale Ieremia, e leai se faifeau e lē fiafia e ave se ie i se toma‘aga a Sumeo, ona o lo latou manatu o se taui lea mo ia i lana galuega faafiafia e lē gata i le taleni o le faleaitu ae o luga o le leitio.
O le molimau a le susuga i le fesoasoani tiakono o Kalolo na ia faamatala ai se tasi aso na afe atu ai Sumeo i lona fale, a o iai ma se tasi o toeaina o lona aiga e fiafia tele i le alii faafiafia toe faasalalau ona o ana poka mālie i luga o le leitio. Fai mai le fesoasoani na te‘i le toeaina ina ua fai atu i ai o Meo lea ua la feiloai.
Na ia fai loa iai e fai sana tala mālie se‘i faalogologo le toeaina. Na fai loa e Sumeo lana solo i le polo. “O le polo e lapotoppoto, a pōpō e osooso, O le polo e lapotopoto ua salafalafa ma maanuminumi, ae o le polo a ai?, o le polo a Kalolo”…Na alu le talie a le aofia na auai i le sauniga faaleaiga ona o le solo foi lea a Sumeo e masani ona faafofoga i ai i luga o le leitio.
Na faamatala le fesoasoani Katoliko o Lotofaga, e lē misi le afea o lona fale e le alii faasalalau i suega ietoga, ma seiloga lava ua iloa e Sumeo ua tele ni mea e tagolima i ai i ietoga ona lē afe atu lea.
O taimi uma foi e afe atu ai na molimau le alii fesoasoani, e faafeiloai lava ia i ni upu masoā mālie a Sumeo.
O le molimau a le afioga i le Sa‘o Faapito le afioga Fiame Naomi Mata‘afa, na ia faamatala ai le ese o se mea na ia molimauina ina ua maliu Molioo Sumeo.
Fai mai le tamaitai faipule o Lotofaga, o se tasi foi o minisita o le kapeneta, sa ia lagona ua mafua ona lē motusia alofaaga ma faamaisega mai le atunuu, ona o uiga tausaafia o Sumeo i lana taleni faafiafia fai faleaitu ma lana galuega faasalalau.
O le taeao e faafesagai o ia ma le atunuu ae faapea foi i le afiafi. O lana polokalame o le kuka o le afiafi o se tasi lea o mafutaga mafanafana ma tagata, ona o Samoa e lē pei o le olaga o le papalagi e fai le faatau ona teu lea i le aisa, ae o Samoa e faato‘ā mafaufau i se meaai o le afiafi i lena lava aso e fua i mea ua maua.
O lona uiga o Sumeo o se tagata sa ola ma soifua mai i le olaga faasamoa na te silafia tulaga faapea ma o le mafuaaga foi lea na ia faia ai lea polokalame i luga o le leitio o le Talofa FM.
O le afioga i le Palemia susuga Tuilaepa Lupesoliai Sailele Malielegaoi, na molimau mo galuega a le auauna sa tautua ai i le Malo. Faaalia e le Palemia, o Molioo o se tagata sa silasila i ai ina ua faato‘ā faavae le vaiaso o le Teuila, e faaaogā lana taleni o le faafiafia fai faleaitu e sui fefiloi ai polokalame ma unai ai le atunuu e auai i le toe faaolaolaina ma le faatumauina o tu ma aganuu a le atunuu i vaiaso o le Teuila.
E maliu Molioo e pei ona molimau le taitai o le Malo, o loo avea ma sui o le Komiti o le Teuila ae o se tasi foi o le Komiti faafoe o le pulega o tagata tafafao. Sa filifilia faapitoa o se sui o le Komiti faatonu o le tauvaga o le sailia o se tausala o le Pasefika i se tasi o tauvaga na talimalo ai Amerika Samoa.
O le taui sa ave e le Malo ia Sumeo e pei ona molimau le Palemia, e lē o se taui tele, ae sa talia ma le fiafia e le auauna. O se luitau foi lea mo isi tagata e pei ona faaalia e Tuilaepa.
O le tofiga mulimuli na ave ia Molioo na ta‘ua e le Palemia, o lona filifilia e avea ma failotu na te amataina fono a le Komiti faatonu o le pulega o tagata tafafao i le amataga, ma o se tofiga na fautuaina ai e le Palemia Molioo e aua na te tala‘ia leaga e tutusapau laua e leai ni tofiga faifeau.
O le molimau a le tina o Lia‘i le faletua o Lea‘egailesolo Molioo Sumeo, sa lototele le tina ma ia faamatala le la mafutaga mafanafana. O le la mafutaga foi e selau pasene le faamaoni o Sumeo, toe selau pasene le pepelo.
“Ua outou silafia uma amio a Sumeo ma ou te lē toe tau faamatalaina, sa outou faafofoga i ai i le tele o molimau i le sauniga faaleaiga. O le tele foi o isi mea sa ou maua mai ia outou molimau”.
O le tina o Lia‘i sa malaga i ni fonotaga ma asiasi ai i se vaega o le fanau i Ausetalia, lea na ia maua ai le tala ua sola le tamā o le aiga. Sa ia faatoese i le atunuu atoa e faamagalo ni sese ma ni aleu o Sumeo i le latou mafutaga.
