Faamavae atu aiga, uo ma ē masani ia Harry Miller

‘E! ua maliliu toa, ua maumau ai ‘aupega o le taua’! Ua logologoā lona talaaga i le musika i totonu o Samoa faapea ma le Pasefika aemaise le aufaipese o le ‘AVA’.
O se polofesa i le taina o le kitara, o se faiaoga o le musika, peitai o le Aso Lulu o le vaiaso na tuanai atu nei na logotala ai Samoa, i se tala faanoanoa, i le maliu filemu ai o lenei tamalii, le Susuga Harry Miller i le falemai i Waitakere Henderson i Aukilani.
Na saili fesoasoani ma sii ma‘i mai Harry Miller faapea si ona faletua ia Monica Miller, i nai masina ua tuanai atu, ina ua maua suesuega ua aafia o ia i le gasegase o le kanesa o le māmā, faapea foi se tuma (tumor) i lona faiai. Peitai ua siliga tali i seu se fofo ma mae‘a foi sailiga o tomai faaonaponei, ua  faamānavaina e le Atua ana galuega ma lana tautua i le musika, aemaise o le mafutaga mafanafana ma si ona faletua sa iai i le taimi na valaau ai lona matai ia te ia, faapea le tagi mai ala o le fanau pele.
O le Aso Sa na tea na tuuvaa atu ai ma molimoli aloaia atu lona tino maliu i Samoa i le mae‘a ai o se lotu faaleaiga sa faia lea i le Aso Toanai, 13 Iulai i le falemaliu o Ligaliga i Magele, lea sa molimauina le faatumulia i aiga ma uo, a o faalogologo i saafiafiga ma molimau o le olaga tautua o le susuga Harry Miller, aemaise o pesepesega a le faaili a nai ona uso na lagiina ni pese aualofa mo si a la uso i lea po.
O le susuga Bishop Peter Brown na taitaia le sauniga lotu o le lotu faaleaiga, a o si ona faletua o Monica Miller na avea ma Fofoga o le po. O se sauniga matagofie ma le fiafia, ua lē pei o se maliu, ae o se faamanatuga o le soifuaga o lenei tamalii Samoa, i le tele o molimau ma pesepesega e manatua ai pea le Susuga Harry Miller.
O loo iai le faamoemoe mo se sauniga faaleaiga i Apia a o lei tuuvaa mo Pago Pago Amerika Samoa i se aso o lenei vaiaso mo le faatinoina o ona toe sauniga ma le talitali mai o le fanau pele, faapea aiga, uo ma ē masani ma lagomau ai lava le susuga Harry Miller i Amerika Samoa. E faamānavaina e le Atua galuega a lana auauna o loo galue o ia o se faiaoga o le musika i le aoga maualuga a Malisi Faasaō i Amerika Samoa, o le aoga lea sa galue ai lava talu mai le tausaga 1995, aemaise o loo avea ma Faatonu o le Aufaipese a le Fatuoaiga a le Ekalesia Katoliko i Amerika Samoa lava.
O lana galuega fesoasoani mo le atinaeina o le musika i tupulaga talavou o le Ekalesia Katoliko o le a faagalogata, auā ua maitauina le tulaga lelei o le musika ma ua tele nisi tamaiti ta kitara lelei ua tulai mai, ona o le galuega na fofoa ma faafailelei mai e lenei tamalii Samoa.
O ia o se alo faasino i se tasi foi o toa manumanu o le musika i totonu o Samoa ua fai i lagi le folauga, le Afioga Tuiafelolo Willie Miller, na muai faavaeina le faaili ‘The Willie Miller Band’ lea sa tata faatasi ai ma ona uso o Maua ma Latū Miller. Sa tele tausaga o faafiafia i le faletalimalo a le Tusitala i Sogi ma tautua ai Samoa i le musika ma amata lauiloa mai ai lava o se tasi o ta kitara numera tasi i totonu o Samoa.
O le 1985 na malaga ai le susuga Harry Miller ma faamautu ma si ona aiga i Amerika Samoa, lea sa faavaeina mai ai le aufaipese lauiloa a le ‘AVA’ faatasi ma nisi tamalii iloga i le musika, o Aleki Fuimaono ma Jerome Grey.
O ia o le ta kitara o le faaili na lauiloa tele i fatuga e iai le Eleni, Naunau i le Ufi, Morning Star, We Are Samoa ma le tele o nisi fatuga o loo faalogoina pea e oo mai lava i le taimi nei.
E pei ona silafia, o le faletua ia Monica Miller o se tasi o tamaitai tusitala ua loa foi tausaga o lana galuega faatusitala ma televise i totonu o Amerika Samoa, o loo avea foi ma Faatonu o Talafou a le South Seas Broadcasting, ma e toaono o nai o la alo atoa ai ma fanau a la fanau. O le a misia le Susuga Harry Miller i lana taleni, i le musika, o ona uiga tausaafia ma le aga mālie peitai o le a manatua pea o ia i taimi uma e lagonaina ai le tatagi o le igi mālie a le kitara o fatuga a tama o le ‘AVA’ i soo se mea.
E momoli atu ai ma faamaisega ma faamafanafanaga mo le faletua ia Monica Miller faapea le fanau pele, Leon, Harry, Tutoatasi, William, Alfred ma Faiane Miller.