E tāua tele le loto faamagalo ma faagalo
E ui i lagona mafatia ma le faavauvau sa feagai ma ufitia ai mātua ma aiga na lua o le afafine o Nylah Masae Faamanu Vau, ina ua faafuasei ona tatala e le oti le mafutaga mafanafana, peitai na faamaonia mai e le susuga ia Afa Vau o le tamā o le tamā o le afafine ua maliu e faapea, ua tafiesea faanoanoaga ma le ao pogisa ina ua oo mai le agaga faamafanafana o le Atua i aiga, uo a ē masani.
O le malemo o le afafine lua tausaga, ma o le masina o Iulai o le tausaga nei lava e atoa i ai lona tolu tausaga, o loo masalomia pea se gaioiga sa faia e se isi, pe na faafuasei foi e lei mafaufauina ona faia.
O lona tuagane e fa tausaga, sa ia gagana ane lava ma tau faamatala le mea sa tupu ia Nylah, ma ia ta‘ua ai sa tulei. Ona pau lea o le faamatalaga sa tau nanunanu ane ai si ona tuagane e pei ona ta‘ua.
Sa toe tagai toto‘a foi i ai le aiga i le vaega tonu o le vai, sa tupu ai le faalavelave, ma iai lava le talitonuga e faigata tele ona oo i ai se tamaititi lua tausaga i le vaega sa tulai ai le mea na tupu.
E ui lava i ia masalosaloga, peitai na saunoa manino le susuga i le faafeagaiga ia Afa Vau, e lē o toe fia talanoa i ai lo latou aiga, ona talu ai ua mae‘a ona fai la latou tala, e faamagalo ma faagalo le mea na tupu.
Na saunoa foi Afa, ua latou taliaina foi tuuaiga o le faatamala na mafua ai le maliu o le afafine.
E faatāuaina foi e le latou aiga le tala a le tamaititi, ma e ono faamaonia foi auā o le tamaititi laititi, e ala ona tautala ona sa vaai i ai, ma e tautala sa‘o foi e pei lava ona silafia. O lona uiga e tele foi sona suesuega e tatau ona fai, ina ia mautinoa le mea moni sa tupu.
Ae peitai o itu uma lava ia sa vaavaai i ai, pe afai e tulituliloa ma faatāuaina le faamatalaga a le fa tausaga.
Ae pei lava ona ta‘ua, e leai ua tasi lo latou aiga, aemaise le susuga ia Uale Gibbon ma le faletua ia Mahina, ina ia faamagalo ma faagalo, ae taulai pea i le Atua mo le lumanai.
Ina ua mae‘a ona tupu le faalavelave na malemo ai Nylah, o le aso lava foi lea na tapuni ai e leoleo le vai taele lea i Waiwera.
O lea taofiga a leoleo, sa toe tatalo mai ai le pulega o le vaitaele i mātua ma aiga o le afafine, ina ia faamalieina e toe oo atu e faia se lotu, ma toe faamanuia le nofoaga, ina ia mafai ai ona aveese le sa ma le taofiga a leoleo, na tapunia ai le vaitaele.
Sa talia aloaia ma le fiafia e le aiga, ma o le mafuaaga lea na toe faaee ai le pasi, ma toe malaga le toatele o le aiga, mo le faataunuuina o le lotu i luga o le vai ma lea nofoaga e pei ona talosagaina.
O le taeao o le Aso Toonai na tea nei aso 12, na toe malaga ai le aiga mo lea faamoemoe.
O le susuga ia Uale Gibbon, sa taitaia le sauniga i luga ma lalo o le vai, ona sosoo ai lea ma le lafoina o le pale, ma le tatalo faamanuia.
O le susuga ia Afa Vau sa fesoasoani i lea lava sauniga faapitoa.
E lē gata i lea, ae sa faapea foi ona auai tagata Whenua poo tagata Maori, e faatinoina foi la latou pitolaau e pei ona masani ai, e aufaatasi ai i le sauniga sa faia e aiga na lua.
