O le siitia o le tulaga o loo i ai nei le lakapi a tamaitai i se isi laasaga maualuga, o le silasila mamao lea o loo taulai i ai le Peresitene o le Iuni Lakapi a tamaitai, Toleafoa Mara Hunter, lea ua toe tofia ina ua mae‘a le fonotaga faaletausaga a le Iuni a tamaitai i le vaiaso nei.
Na faaalia manino e le tamaitai peresitene, o lona toe tulai mai i le tofiga o le a ia silasila toto‘a ai i auala eseese e mafai ona faatino, ina ia faaaogā tatau ai le taleni o loo iai i alo ma fanau tamaitai o le atunuu, i le taaloga o le lakapi.
“O tomai ma agavaa o loo i tamaitai Samoa, e matuā telē lava le avanoa e mafai ai ona oo atu i se tulaga maualuga, pau lava le matafaioi a le Iuni ma a‘u o le peresitene o le unai ma atia‘e le tomai o loo taotaomia i tatou fanau”.
E silia i le 20 sui o Kalapu ma Iuni Lakapi a tamaitai na auai i le fonotaga faaletausaga, lea foi na suia ai ma nisi o tofiga e lua i le laulauafono.
O le alii tusitala o le nusipepa a le Samoa Observer, Aigaletaulealea Fatu Tauafiafi lea na ia umia le tofiga failautusi, na manino lava lana faamavaega mai i le tofiga ona o le tele ma le anoanoai o ona tiute ma faiva o loo tuatuagia ai.
O le faatuina o le tamaitai loia, o ia foi o le taitai o le au lakapi a tamaitai o le Town Warriors, Treena Atoa na lagolagoina e le fonotaga e avea ma failautusi o le Iuni Lakapi a Tamaitai.
O le galuega aupito sili ona fesiligia i fonotaga faapenei, o le teutupe, lea ua seei ane nei i ai sui o le au lakapi a tamaitai mai Saanapu, Mr Seiuli Salesa, e na te vaaia ma faasoasoaina lelei seleni a le Iuni a tamaitai, ua sui tulaga i lē na umia le tofiga, o Julie Finau.
O le susuga Rev Mataafa Logopati, o se sui o le komiti faatonu a le Asosi Lakapi a Aoga Maualuluga i Samoa, o ia foi o le pule o le Kolisi o Uesele (Wesley College), o loo tumau pea i le tofiga o le Peresitene Lagolago.
O isi sui o le Komiti Faatonu e aofia ai Niu Leatuau, Lafaitele Aiga Esera, Aigaletaulealea Fatu Tauafiafi, Senetima Samau, Amituanai Nemaia, Julie Finau, Lenata‘i Victor, Lemalu Nele Leilua ma Tia Palamo o le Kalapu a le Town Warriors.
