O le feteenaiga sa aliali mai talu ai nei poo ai tonu o loo pulea ma faatonutonuina le asosi o taaloga afeleti a Samoa, ua tafiesea nei ma ua sagatonu ai nei lona pulega ina ua faamatuu i le masina na tea nei e le matagaluega o leipa le tusi faamaonia o le pulega fou ua iai a le asosi. O le tofa Luatua Semi Epati o le pelesetene fou lea ma ua sui tulaga ia Lalau Willie Fong ua leva tausaga o seei i le tofiga pelesetene. O le sui pelesetene o le afioga Tuala Tommy Stencil ae o le failautusi o le susuga Fanaea Too Te‘o, ma lona sui failautusi, le tamaitai o Mesepi Kasiano-Sialaoa.
O le alii loia le afioga Toleafoa Solomona Toailoa o le sui lea o le faalapotopotoga ua nafa ma le itu i le tulafono. Ua faailoa e le pelesetene fou le aloaia o le latou laulau ua pulea nei le asosi o taaloga afeleti, ina ua mae‘a ona toe tafi ma salu ese nisi o faaletonu na luitauina ai le latou komiti faafoe, ina ua faaalia e lē sa avea ma pelesetene o loo tumau pea lona tauaveina o le tofiga, e ui ua iai suiga ua mae‘a ona faia i le tulaga faavaomalo ma faalapotopotoga taaloga afeleti a atunuu o le Oceania faapea le faalapotopotoga autu.
O mea na tutupu ua faaalia e le pelesetene ia Luatua Semi Epati, ua faasola i nuu o mala ae tuli se ‘ai lelei mo le lumanai o taaloga afeleti a Samoa auā alo ma fanau a le atunuu o loo naunau e atinae taaloga afeleti.
O le Failautusi ua tofia ai le tofa Fagaea TooTeo faatasi ai ma lona sui le tamaitai o Mesepi Kasiano. O le tulai mai o lenei suiga i le laulauafono a le asosi, e manatu le toatele, o se ataata o taulelei i le tulaga o le a ono toe siitia ai lea foi vaega o taaloga i totonu o le atunuu. Faaalia e se tasi o sui o lenei komiti faafoe fou e pei ona iai i nisi o tusitusiga a le nusipepa a le malo, le Savali, ua leva ona tanumia Samoa e ala i le leai o ni ona sui i taaloga e lē gata i le Pasefika i Saute a e faapea foi i taaloga o Malo o le Taupulega.
O le mea mautinoa e lē o alo uma ma fanau a Samoa e fiafia i le lakapi, le soka, ma isi faagatama, ae toatele foi isi tamaiti e fiafia latou i taaloga afeleti, ma e iai le talaitonuga afai ae toe faatulaga ni taamilosaga e lalaga ma faamalosia ai lenei taleni, e ese mai afeleti a aoga e pei ona faia i tausaga taitasi, o le a telē se toe malosi mai o Samoa i nei taaloga.
Ua nofosauni lenei komiti e galulue faatasi ma le matagaluega o aoga, ina ia faagasolo nisi o polokalame e le na o totonu o le taulaga, ae faapea i aoga i afioaga uma o le atunuu, o ina e mautinoa o loo natia ai taleni afeleti a nisi fanau o le a mafai ona faalauiloa pe a iai ni polokalame faagasolo.
Tau ina ia manuia le tulai mai a le laulau fou ua sagai atu nei mo le faafoeina o a latou galuega, ina ia matua lalaga le taleni a fanau o le atunuu i taaloga afeleti.
