Ua sosoo mai lava le tele o faamatalaga ma lipoti ua faalauiloa i le manaoga e fausia ni nofoaga mamā ma le lelei atoatoa auā le fasi ai o manu papalagi ma le saunia o aano o manufasi mo le fia faatau atu i fafo.
Ae o le faafitauli tele lea ua vaaia ai le faasā ona faatau atu i fafo o aano o manufasi mai i Samoa nei ona e lē taitai ausia e nofoaga o loo i Samoa nei le mamā e talafeagai e mafai ai ona gaosi aano o manufasi mo le faatau atu i fafo.
“O lea ua faamautu talanoaga mo se fale fasimanu lelei atoatoa i Nuu i le tausaga fou,” o le saunoaga lea a le alii Ofisa Sili o le Matagaluega o Faatoaga faapea ai Faigafaiva le afioga Fonoiava Seali‘itu Sesega.
Ua iai se fuafuaga a le Matagaluega ina ia iai foi ni taavale tetele o le a malaga i afioaga e iai lafu manu papalagi mo le fasi mai ai o manu papalagi. O le tulaga o iai nei a iai le manaoga o aiga e faatau atu manu papalagi i faleoloa mo le fuaina e fasi mai lava i le tele o faatoaga manu papalagi.
E tasi lava le nofoaga o loo saunia ai oloa o aano o manufasi i le taimi lenei o loo umia e le Malo, o le fale fasimanu lea o loo i Avele. O se nofoaga e laitiiti ma ua faaaogā nei e le tofa Panoa Moala lea sa pule o le Faleoloa o Faatoaga i tausaga ua tea faapea ai le NPF. Ua faatau nei i faleoloa aano o manufasi i lea nofoaga atoa ai sosisi, o ham ma bacon.
E laititi ma e le gafatia ai nisi aufaipisinisi e ono iai le manaoga e faatino ni atinae faapea. O le tele lava o faleoloa e pei o supamaketi ua o latou faaaogā lava a latou atinae mo manaoga e pei o le faatau atu ai o oloa o manufasi i le atunuu ma ua faatautaia lava i totonu o a latou pisinisi ia nofoaga e pei ona vaaia ia Lynn Netzlers i Motootua faapea ai Farmer Joe i Fugalei.
O se fale tele ma ua atoatoa le tali atu i manaoga mai i fafo lea ua agai nei i ai le malo e pei la ona iai fuafuaga e pei ona faalauiloa e le Matagaluega.
O Samoa le isi atumotu o le Pasefika ua vaavaai i ai i le oloa lenei o aano o manufasi ua mafai ona faatau atu pe a fuafua i lafu manu ua vaaia i Samoa.
O Vanuatu le atunuu o le Pasefika ua mamao lava lana atinae lea ma ua faatau atu i Niu Sila, Ausetalia, Amerika ma Farani ana aano o manu fasi.
O lea faato‘ā mae‘a foi se aoaoga na faatautaia i le Aoga o Faatoaga a le Iunivesite o le Pasefika i Alafua ua talanoaina ai e Samoa, Vanuatu ma Fiti lenei maketi o oloa e mafai ona faatau atu i fafo e pei o aano o manufasi, ma o le faafitauli tele lava lea na faalauiloa foi i le itu a Samoa, o le leai o ni nofoaga mamā atoatoa mo lenei faamoemoe tele.
O lea la ua gaioi le Matagaluega o Faatoaga ma Faigafaiva mo lea faamoemoe ma le folafolaga e oo atu i le tausaga fou ua iai ni fale mautu aemaise o taavale aisa nei auā le faagasolo ai o le aoina o manu fasi mo aano o manufasi e avatu i atunuu mamao.
O loo tālia foi feutagaiga ma le malo o Amerika Samoa ina ia toe tatala ai le auina atu o ia lava oloa e pei o le sosisi ma le povi masima i le teritori lea ua tusa ma le 10 tausaga talu ona tapu le avatu ai o nei oloa mai i Samoa nei.
O le taofiga o nei oloa mai i le faaulufale atu i Amerika Samoa na faapea ona faamalosia mai i Amerika – ma le fuafuaga e toe faia se isi asiasiga o ni fale fasimanu i Samoa nei i le faaiuga o le tausaga ona o le manaoga lava e toe tatala le maketi i lea itu o le atu Samoa mo oloa ia mai i Samoa nei.