Faamautu meli la‘upasese mo le taligamalo a Samoa

O se faaaliga le alii Palemia i se faatalatalanoaga i le vaiaso na tea nei. O lea ua faamautu le vaa poo le meli la‘upasese o le a taula i le uafu i Apia mo le taimi atoa o le fono tele a malo laiti o Aferika le Karepeane ma le Pasefika i le tausaga fou.
O se vaa ua manatu le Malo e tatau ona aumai ona e lē lava potu o faletalimalo o iai nei mo lenei taligamalo.
E silia i le to‘a 3,000 sui usufono mai konetineta nei e tolu o le a i Samoa i le tau faaiuiuga o le tausaga fou mo lenei fono ma na ta‘ua e le alii Palemia le Susuga Tuilaepa Lupesoliai Sailele Malielegaoi, o lea lava o loo iai faletalimalo o Samoa ua amata ona faatalatalanoa i lenei taligamalo ae e lē taitai lava nofoaga ua i Samoa i lenei vaitaimi mo lea taligamalo tele.
O le vaa a se kamupani o meli la‘upasese ua faaigoaina o le Pacific Jewel lea ua faamautu le aumai e le Malo o Samoa mo lea faamoemoe.  E lei talanoaina e le Alii Palemia le tau o lea vaa mo le taligamalo ae na ia faaalia o le a mafai ona tali ai le to’a 1,850 o sui usufono. O le isi toatele ua iai faletalimalo o le a faasoa uma i ai. O le faamatalaga a le taitai o le Malo, afai e manuia le taligamalo o le tausaga fou e iai le isi foi fono tele e tali tutusa lava le toatele o le a malaga mai ai i Samoa, ma o le a toe agai foi i se faiga faapea e faaaogā ai meli la‘upasese mai fafo pe a lē gafatia lava e Samoa ona fausia faletalimalo mo fono tetele faapenei.
O le tele o faletalimalo e iai le faanaunautaiga i taligamalo faapea, peitai e na o le taitasi i tausaga poo le ta‘ilua i le tolu tausaga faato‘ā maua avanoa faapenei.
O le taimi lenei na ta‘ua e le toatele e ana faletalimalo e eseese lava taimi o le tausaga ma e iai lava le vaitau e matuā leai lava nisi e nofoia a latou faletalimalo ma e faaletonu ai lava pisinisi.
O le toatele foi o tagata asiasi mai e na o le taitasi lava aso e nonofo ai aemaise pasese o meli la‘u pasese tetele nei. A umi lava ona nonofo i Samoa e na o le ta‘ilua aso e nonofo ai.
O isi ua ta‘ua e le Asosi o Faletalimalo i lipoti ua mae‘a e tele ina agai i nuu i tua ma o mataaga tu matafaga e tele ina faaaogā. O loo fesoasoani tele le manumalo o Samoa i taligamalo o fono a faalapotopotoga eseese o le Pasefika ma taligamalo o taaloga faavaomalo e fai mai i Samoa.
O le faamoemoe ina ia mafai ona faaauau ona maua e Samoa fono tetele nei ina ia mautinoa le toatele o i latou e agai mai i le atunuu.
E afe valuselau ma ona tupu tagata ua fuafua o le a nonofo i luga o lea meli la‘upasese o le a aumai e le Malo e faamautu i ai nisi o le toluafe o lenei auusufono.

Tapenaga o le Saogalemu
O tapenaga o loo faia nei e le Malo mo lea fonotaga tele o se taimi muamua o le a talimalo ai le atunuu i se fonotaga pito toatele ni usugafono ma tagata o le a auai, o lea foi la o loo feagai ai foi le matagaluega o leoleo ma sauniuniga mo le puipuiga o le saogalemu poo le security.
I se talanoaga faasamasamanoa ma le Komesina o le matagaluega na ia ta‘ua ai, o le a iai le taimi e malaga mai ai se sui o le puipuiga o le sogalemu a Malo Aufaatasi e silasila ia latou tapenaga poo ausia le tulaga maualuga e manaomia ina ia talafeagai ma manaoga o auaunaga faapenei a Malo Aufaatasi.
Faaalia e le Komesina e na o le lima selau le aofaiga o leoleo, ae afai e toatele nisi o le a manaomia mo le faia o tiute mo le puipuiga o le saogalemu o usugafono ma nofoaga o le a faamautu ai, o le a ono tāpā se fesoasoani mai ia i latou sa galulue muamua o ni malu o le Malo auā nisi o galuega e manaomia i le faasologa o tiute masani  a leoleo ma avanoa ai i latou o loo galulue e auai i le tiute o le puipuiga o le saogalemu o i latou o le a malaga mai mo lea faamoemoe ia Oketopa o le tausaga asau.