Faamautu le Tausala fou o Samoa

Ua faamaonia e le Pulega o Tagata Tafafao Maimoa mai le tamaitai ua avea nei ma Tausala o Samoa, le lona tolu ai o tamaitai ua tofia i lenei tofiga a le atunuu.
O le tamaitai o Taavalea Nilon o loo aoga i le taimi nei ae o loo ua faataatia nei ana aoaoga ina ia tali mai i le valaau atu ina ia avea ai nei o ia ma Tausala lona tolu a le atunuu.
O se tamaitai o lona tama o le Ausetalia ae o lona tina o le Samoa ma ua maea ana taumafaiga i le Tikeri maualuga o aoaoga faainisinia mai le Iunivesite o Ausetalia i Canberra. O loo agai ana aoaoga i le faailoga o le Masters Degree.
E pei lava ona silafia ua sui tulaga Nilon i le tamaitai o Tusisaleia Hope Pomele “le Tausala Samoa ua faamavae.
O Pomele na suitulaga i le tamaitai na pale mai i le sailiga o le Tausala o Samoa i le Teuila o le tausaga 2009-2010 o Jacinta Bourne.
E ese lenei nofoaiga ua vaaia ai le tolu o tamaitai ua oo i ai le pale o le Tausala Samoa.
Muamua o le tamaitai o Jacinta Bourne na faamavae ona “o mafuaaga tau ia te ia lava.”
O le lipoti mulimuli e faatatau i lea tamaitai ua i Fiti ma lana uo na aooga faatasi i le Aoga o Faatoaga a le Iunivesite o le Pasefika i Saute i Alafua.
O Novema lea na suitulaga mai ai loa le tamaitai o Tusisaleia Hope Pomele, o se tamaitai na tulaga lua i le faaaliga tele o Tausala a Samoa i le Teuila ua maea atu.
O se tamaitai o loo aoga i le tomai faatausi soifua i Hawaii ma na malaga sao mai lava ma tausinio o le Tausala o Samoa i le faaaliga Tausala a le Pasefika.
Na foi mai lea tamaitai ma agai loa i Hawaii aua le sauni ai e malaga mai ae o lana faamavaega i le lua vaiaso talu ai na laga ai mataupu e pei o le leaga o le tali atu a le Ofisa o Tagata Tafafao i talosaga ua ia tuu atu i ai e faatatau i le fale o le Malo lea e nonofo ai Tausala mai fafo e pale mai i le Tausala o Samoa.
Na taua e lea tamaitai e le ola le suavai, leaga le eletise, leai ni meafale e oo lava i pupuni o faamalamalama ua leva ona talosagaina.
Na le malie foi le tamaitai i le toe suesueina o ia a o sauni e malaga mai e nofo loa i Samoa i le tausaga atoa.
O ia suesuega na tali mai le Pulega o Tagata Tafafao mai, o aiaiga lava ia o le tulai mai o se tamaitai e nofo i fafo i le pale o le Tausala o Samoa.
Faaalia e Matatamalii Sonja Hunter e suesue lava le faamaoni o le fesootaiga o soo se tamaitai mai i fafo i Samoa nei. E suesue ai lona tupuaga ma lona aiga.
O le mau a lenei tamaitai o lona aiga i Samoa nei e mai i Falefa e ui na fanau i Amerika Samoa ma aoga ai i Hawaii.
O le mau a nisi ua fetusiai i lenei mataupu ua tagisa le tamaitai Tausala a o nisi ua faapea mai, aisea ua toe suesue ai le tamaitai i le maea ai ona tuu atu le pale o le Tausala Samoa ae ua leva lava ae le faia lea gaioiga e le Pulega.
O le faamatalaga a le tamaitai ua tulai mai nei i le tofi Tausala o Samoa Taavalea Nilon, e ui i mea uma ua tutupu a o lei oo mai i le tofi e taua ia te ia le tofiga.
“O se tofiga e le au maua ma o au o le Samoa o au o le tagata e manao ina ia tulai mai ma ia lelei atoatoa le faafoega o le tofiga”, o sana faamatalaga lea i Tusitala ina ua aloaia lona tulai mai.
O le fono tele e faatatau i atinae faaleleia mo Tagata Tafafao mai, lea na faalauiloa ai loa lenei tamaitai i le faaiuga o le vaiaso na tea nei.
O Nilon na tulaga tolu i le faaaliga o Tausala a Samoa i le Teuila o le tausaga ua tuanai ma na avea ma tausala a le Faleaiga o le McDonalds i Apia.