Talu ona faavae mai le kamupani lenei ua gaosi ai uaea taavale i Samoa ma avatu i atunuu mamao, o loo tumau pea le avea o le Yazaki EDS Samoa Ltd, ma falefaigaluega aupito toatele tagata Samoa ua faafaigaluega ai.
E oo lava foi i vaitaimi faigata o lea pisinisi e pei ona vaaia ai le vaea o le afa o ona tagata faigaluega i tausaga e lua ua tuanai atu ona ua tapuni mai fale taavale na manaomia uaea o loo gaosi i Samoa, ae ua amata nei foi ona toe vaaia le toatele ua toe agai ma maua galuega i lea lava falefaigaluega i Vaitele.
O se faailo ua amata foi ona toe agai i luga le manaoga mo nei oloa ua gaosi atu i Samoa. Ua 20 tausaga o le Yazaki i Samoa ma ua toatele aiga Samoa ua maua mai ai le faamama avega ona o galuega nei ua maua ai a le toatele.
Ae ua le gata la i le aufaigaluega le fesoasoani a lenei kamupani mai i Iapani, ua faalautele foi le tele o ana fesoasoani mo isi polokalame a le Malo e pei o le puipuiga o le siosiomaga, ma le foai lea na tauaao atu i le vaiaso na tea nei, lea ua avea ai lea kamupani ma uluai lagolago malosi o le faamanatuina o le 50 o tausaga talu ona tutoatasi Samoa.
E $150,000 (tala) le siaki na tauaao atu i le tasi o Taitaifono o le Komiti a le Tutoatasi – le Afioga i le Minisita o Mataupu tau Tina ma Tamaitai, Atina‘e o Nuu ma Aga Fesootai, le Afioga Tolofuaivalelei Falemoe Leiataua. Faaalia e le Pulega o le Yazaki Samoa, ua manino le taua o lenei faamanatuga o le Fu‘a o Samoa, o se atunuu ua latou molimauina le tele o lana faataua i lona talafaasolopito aemaise o ana tu ma aga ina ia faaolaola pea ma ia faamalosia.
O se vaiaso o le a tumu i polokalame eseese le faamanatuga o le Fu‘a ma e manino lava e le taugofie mo le Malo lea faamoemoe, o le mafuaaga lea o le manatu o le Yazaki Samoa e tali mai ma tuu mai lona tau‘au e fesoasoani ai i le faatupega o nei mau polokalame ua amata lava ona faalauiloa ma faagasolo.
Faaalia le agaga faafetai o le Komiti o le Tutoatasi ona o le fesoasoani tele i lenei fuafuaga o le faamanatuina o le Fu‘a a le atunuu.
Ua tele foi nisi ua talosagaina ai le fesoasoani e pei ona maua mai i le Yazaki Samoa Ltd, ma o le vave ona faamautu atu o le Lagolago lenei ua ta‘ua o le Gold Sponsor, o le vave foi lea ona faatino o le tele o nei fuafuaga i le tupe ua taulimaina.
O loo faaauau ona valaau avanoa faigaluega a le Yazaki Samoa i le taimi lenei e pei foi ona iai se manaoga mo se isi laina o uaea ua toe fia gaosia ina ua tatala mai le avanoa mai i Ausetalia mo ana taavale ua moomia ia ituaiga oloa ma ua amata foi ona vaaia le toe faatumulia o fale faigaluega i Vaitele ia i latou ua toe agai mai e faatino ia galuega mo atunuu mamao.
Ua tele foi tausaga o feagai pea Samoa ma lu’itau e pei o le ono tapunia o lenei fale faigaluega tele ona o le taugofie atu o le gaosia o nei oloa ma le laititi atu o totogi ua ofo mai isi atunuu i Asia latou te faatinoa ai auaunaga a le Yazaki peitai o lea lava ua 20 tausaga o tumau pea le Yazaki i Samoa ma le faamoemoe o le a oo atu i le isi 20 o i luma pe sili atu foi, o iai pea le Yazaki i Samoa nei.
