E faitau miliona le fesoasoani a le Malo o Saina o le a fausia ai le Aoga Faaleoleo poo le Samoa Police Trainning Academy i Tafaigata i le nofoaga o loo iai le falepuipui. E faatoa faagaioi lea galuega tele pe a mae’a ona siitia uma galuega a le matagaluega o le Ola toe Fuata’ina poo le falepuipui faapea ma le au nofosala i le nofoaga fou i Tanumalala.
O le vaiaso ua mavae sa sainia ai e le Komesina o Leoleo afioga Fuiavailili Egon Keil le feagaiga ma sui o le Malo o Saina ao lei faatinoina le galuega.
E pei ona silasila i le ata tusi o le nofoaga o le Aoga Faaleoleo e le tau fesiligia o se nofoaga o le a atoatoa uma iai vaega o auaunaga mo le aoaoina o alii ma tamaitai e fia avea ma leoleo poo Malu o le Malo.
O se Aoga muamua lea mo galuega faaleoleo i Samoa aua o le taimi nei o loo avea lava le nofoaga autu o le Matagaluega i Apia ma nofoaga e tapuvae tasi iai le aoaoina o alii ma tamaitai e talia mo le avea ma leoleo o le Malo. O le faamautu ai o le fesoasoani a Saina ua fuafua ai o le taulotoaiga o le tausaga fou 2019 e tatau ona amata ai le galuega ma le faamoemoe e mae’a i se taimi o le tausaga e 2021.
O le au malaga mai Samoa o le Komesina o leoleo, o le ofisa sili lagolago o le Matagaluega o Galuega tetele a le Malo le faletua o Tilianamua Lorna Aloalii, ma le ta’ita’i leoleo o loo faauluulu iai le vaega o aoaoga mo Malu o le Malo le susuga Mua’autau Joseph Taioalo, o ia ose tasi o alo e faasino i le Komesina o leoleo ua tuumalo le susuga Fou Taioalo.
Ua ave le faafetai a le Matagaluega o Leoleo i le matagaluega o le va i fafo a Samoa faapea nisi o matagaluega a le Malo i le lagolago atu mo le faataunuuina o le faamoemoe i le tapenaina o se ata o le nofoaga.
O se tasi o fuafuaga mamao a le Malo o le aoaoina lelei o alii ma tamaitai leoleo o le Malo ina ia maua le poto ma le atamai e faia ai galuega uma faaleoleo aua o se isi lea laasaga lelei tele, pe a aoaoina lelei Malu o le Malo i le faia o suesuega o soligatulafono eseese, aemaise o le tuuina atu o le puipuiga malu mo le atunuu lautele.
