Faatoa mae‘a i le vaiaso na tea nei se fono tele na usuia i Fiti mo atunuu o le Pasefika e aofia ai ma Samoa.
O lea fono tele ina ia faamautu aoaoga mo fanau i Aoga Amata. O se taumafaiga o le a aloaia ai le tele o aoga amata i totonu o le aotelega o aoaoga a atunuu uma o le itulagi.
O le taimi lenei i Samoa ua tele sui resitara o aoga amata i totonu o le atunuu ae o loo faatautaia lava e le Asosi o Aoga Amata ana ia aoaoga aemaise o ana lava faiga faavae ae o le faiga lenei o le a avatu ai faiga faavae o le a lima taitaina ai aoga amata uma ma o le a avea ma vaega o le Matagaluega o Aoga.
O le lala o Malo Aufaatasi o loo feagai ma le atinae o fanau, le UNICEF lea e vaaia lenei galuega tele, ma na saunoa le sui o le UNICEF ina ua mae‘a lea fono tele o le faamautu o nei faiga faavae o le a mautinoa ai le siisii maualuga o le tulaga o le a iai aoaoga mo fanau laiti nei, ma o le a lava sauni ai mo aoaoga muamua (primary school).
Faaalia e Dr Isiye Ndombi o le UNICEF o le a avea lenei gaioiga ua malilie uma i ai sui o aoga amata na auai i lenei faamoemoe ma faamalosi i mataupu o le a aoaoina i fanau laiti i aoga amata.
O aiaiga o nei fuafuaga faataatia mo Aoga Amata, o le a aofia ai le sao o Matagaluega o Aoga i le faamautuina lea o faiga faavae, o mataupu, o le matauina o galuega faafaiaoga i le amataga lea o aoaoga a le fanau, atoa ai le vaavaai lelei o le agai i luma o nei aoaoga.
E le gata i lea o le a faapea ona faamalosia ai ma le sao o tagata o afioaga o loo iai nei aoga amata.
O le masina o Me i le Fono tele faaletausaga a Minisita o Aoga a le Pasefika lea o le a laga ai loa lenei fuafuaga mo le faamaonia e Minisita o le Pasefika, ma o a lava suiga o le a iai ina ia aofia aoaoga amata i galuega a Matagaluega o Aoga, e iai le manatu o le UNICEF o se suiga tele lenei i le talafaasolopito o le atinae o aoga i le Pasefika.
O Samoa lea ua aofia aoaoga mo faiaoga amata i le Aoga Faafaiaoga i le Iunivesite Aoao o Samoa, ma o se tasi lea o auala ua amata ai le faaofi mai o Aoga Amata i totonu o le aotelega o galuega a le Matagaluega o Aoga.
