O le aso na sili ona lagona ai e le alii o Fesilafai Fetalaiga, e matuā atoatoa le faafouina o lona malosi, a o tutulai mai e faatali le taunuu atu o lana manamea, le tamaitai o Crystal Hana Milovale, a o momoli faatasi atu e nai ona mātua i totonu o le malumalu o le EFKS Papatoetoe.
Na molimauina loifofoga maligi i lea taimi, ae o aga masani ia o aso faapenei, e filogia loifofoga o le fiafia ina ua taunuu manuia le faamoemoe o alo ma fanau, ma loifofoga faavauvau o mātua pe a mafaufau ane, ua motusia nei le sootaga sa masani ai, le afafine i lalo o le puipuiga a ona mātua, le atalii mai le vaavaaiga a ona mātua, ae ua faamamulu atu nei i laua e amata fausia a‘e lo laua lava aiga fou, ma le faamoemoe o le a faamanuia le Atua le Tamā i lenei ulugalii fou.
E fitu tausaga o faagasolo mai lenei faigauo, ae o le tausaga lona 8 o le la faigauo lea na filifili ai loa Crystal ma Fesilafai o le a faapaiaina le la mafutaga i le sakalameta o le faaipoilpoga.
O le tamaitai o Crystal Hana o le alo o le susuga ia Ray Milovale mai Toamua i Faleata ma le tina ia Lisa Milovale mai Leulumoega Tuai. O le alii faaipoipo o Fesilafai, o le alo o le tina ia Leu Fetalaiga mai Faleasiu ma si ona tuaa le tamā ia Mataafa Iupeli Fetalaiga ua maliu mai le afioaga o Palauli i le motu tele i Salafai. E momoli tele atu faamanuiaga ma alofaaga o oulua aiga ma uo uma mo le
lua aiga fou.
